Una de las reviradas pus grèvas qu’a patidas darrièrament la lenga occitana e lo movement que lucha per n’evitar son escantiment es, benlèu, la liquidacion de la societat cooperativa Vistedit, e en consequéncia la mòrt de La Setmana, Papagai e Plumalhon, de publicacions istoricas e indispensablas pel mantenement e per la dignitat de la lenga occitana. Una autra pèrda fòrça grèva qu’avèm patida es la desaparicion de la FIMÒC, la federacion dels mèdias occitans que Jornalet ne fasiá partida. Sa desaparicion es tanben causada per una marrida decision de l’Ofici Public de la Lenga Occitana (ÒPLO). En mai de tot aquò, en agost passat apreniam tanben que l’IEO-Lengadòc aviá licenciat sa directritz a causa del retirament de las ajudas publicas. Dins son comunicat, l’IEO mostrava un plan de resisténcia que Jornalet saludava dins un editorial. Ara, nos pausam la question se d’autras associacions son estadas tocadas a causa de decisions de l’ÒPLO.
 
La còla de Jornalet sèm espantats. E mai se l’ÒPLO es un organisme public, es portat per d’occitanistas que se son totjorn batuts per l’interès de la lenga occitana. Es per aquela rason que podèm pas comprene qu’aja suprimit tanta òbra per l’occitan e tantes emplecs de bons professionals.
 
Libertat a publicat un comunicat fòrça dur contra l’ÒPLO. Lo movement de l’esquèrra revolucionària d’Occitània acusa l’ofici d’aver tuat deliberadament de publicacions istoricas en occitan coma La Setmana, Papagai o Plumalhon e de far un apèl a projèctes per una nòva publicacion que lo quite ÒPLO contrarotlariá. E mai exigís que l’ÒPLO torne sus sa decision e repare lo prejudici qu’a provocat e que los uèch membres de l’Ofici Public demissionen e sián remplaçats per de militants occitanistas. Dins aquel comunicat, nos a tirat fòrça l’atencion lo planh de la manca de reaccion de l’occitanisme. “Pas de peticion, pas de manifestacion, pas de taula desquilhada... non, just un marmús leugèr de maucontentèr”, çò ditz lo document de Libertat. Cresèm qu’an rason: es ora de dire “pro es pro”, d’exigir d’explicacions, de responsabilitats, de reparacions e de demissions.
   
Jornalet es ara viu, mai que mai gràcias a la generositat de sos legeires. La majoritat d’aquel mond, que nos mandan lor sosten e que mercejam fòrça, tanben pagan lors impòstes. Amb lor argent, l’administracion publica deu decidir çò que finança. Deurián pas far de dons per l’occitan. Es per aquò que se creèt l’ÒPLO. E costèt una cauma de la fam.