Amb aqueste editorial, la còla de Jornalet vòl mercejar sos legeires, car an reüssit a assegurar l’existéncia d’aqueste quotidian en linha almens fins a l’an 2020. Mercés a totes los que nos avètz mandat d’argent, de messatges de solidaritat, de vam... e tanben mercés als qu’avètz partejat los articles publicats, qu’avètz prepausat d’articles per publicar, que nos avètz donat d’idèas, qu’avètz fach virar la campanha de sosten e l’avètz raportada endacòm...
 
Lo mes de setembre comencèt magre per las finanças de Jornalet. Las ajudas de la Generalitat de Catalonha èran pas totas arribadas e durant l’estiu aviam patit de panas informaticas que costava car d’adobar. Èrem dins una situacion esglasianta e sabiam pas se poiriam tenir còp fins a la fin de l’an.
 
Aviam las promessas d’ajudas de l’administracion publica catalana mas sabiam qu’èran de mal obténer.  Après l’aplicacion de l’article 155 en Catalonha e Aran, los foncionaris del país complissián un trabalh enòrme per respectar cèrts engatjaments d’institucions jos contraròtle estrech e sens finançament pròpri.
 
E arribèt lo miracle. D’un caire, la còla de l’Associacion dels Amics de Jornalet avièt una campanha de solidaritat. Una pagina de Facebook raportava las reüssidas del temps que se fasiá virar las divèrsas coordenadas de las associacions Los Amics de Jornalet (de drech francés) e Associacion entara Difusion d’Occitània en Catalonha (registrada a la Generalitat). Atal son venguts de dons d’un costat e l’autre dels Pirenèus, via PayPal, de transferiments bancaris e de chècs. Caliá 3000 èuros per assegurar la vida de Jornalet fins al mes de genièr que ven. Sèm arribats a 4135!
 
D’autre caire, lo 1r d’octòbre arribèt la rèsta de la subvencion de la Generalitat de Catalonha e lo pagament de la publicitat del Conselh General d’Aran. E mai, la comuna de Tolosa nos encarguèt d’una publicitat per un mes, en contribuir amb son granet de sable. Amb tot aquò, l’existéncia Jornalet es assegurada entrò l’an 2020. E puèi esperem que l’ÒPLO aja reconsideradas sas politicas de finançament.
 
Jornalet es publicat cada jorn gràcias al sacrifici de cèrtas personas. Volèm assegurar un petit salari simbolic pel cap-redactor e pel redactor-corrector. De pagas qu’esperam qu’un jorn poiràn èsser mai dignas. D’autras despensas son lo servidor d’Internet, las despensas bancàrias, las indemnitats per desplaçaments, los servicis de gabinet juridic... Fins ara, avèm fach d’esfòrces per conténer tot aquò dins un budget minimal.
 
Al nivèl de las recèptas, Jornalet ten bon gràcias a las ajudas publicas, a la publicitat e, dins un 20%, als dons dels legeires e dels Amics de Jornalet.
 
Lo jornal que sètz a legir quitarà pas de paréisser cada jorn amb d’articles nòus e de nòvas opinions e quitarà pas d’èsser d’accès gratuit. La lenga occitana e l’espaci occitan de comunicacion son tròp fragils, uèi lo jorn, e i podèm pas metre mai d’obstacles. Ont arribarà pas l’argent i metrem mai d’oras panadas a la familha, al sòm e al trabalh. L’enòrma solidaritat dels legeires nos a donat de vam e de fòrças.
 
Mercés plan!