capçalera biera tobiers

editorial

La comuna de Marselha es responsabla de la mòrt d’uèch de sos ciutadans

| @CitoyenneA
E mai se se parla que de la mobilizacion generala contra la pojada del còst dels carburants, a Marselha —e esperem que dins la rèsta d’Occitània— persistís la ràbia e l’indignacion dels ciutadans per las uèch victimas mortalas de l’esfondrament de tres vièlhs immòbles en Carrièra d’Aubanha, dins lo quartièr de las Noalhas. Aquela tragèdia se seriá poguda evitar amb una bona gestion politica.
 
Lo quartièr de las Noalhas es un dels pus paures de la Ciutat Focèa e un immòble sus dos poiriá èsser considerat coma indecent o degradat. A mai, un 20% dels bastiments del quartier se tròban dins un estat de degradacion avançat, en procedura d’insalubritat o de perilh. Èra lo cas dels immòbles esfondrats.
 
Lo procès de reabilitacion que se faguèt en aquel quartièr entre 2001 e 2009 foguèt insufisent. En 2011, la municipalitat s’èra engatjada dins un vast plan de requalificacion del centre vila, mas sens remediar al problèma. Segon un rapòrt remés al govèrn en 2015, lo lotjament indigne menaça la santat o la seguretat d’”unes 100 000 abitants” de la capitala de Provença. Quitament abans la tragèdia, la gestion de l’abitat per la comuna de la capitala de Provença èra ja criticada. Le Monde publiquèt una nòta confidenciala de l’Agéncia Regionala de la Santat en revelant de mancaments dels servicis de la comuna.
 
Mas una de las donadas que nos a mai atrach l’atencion son las paraulas de David Mateos Escobar sus RFI en espanhòl. Aquel arquitècte e urbanista marselhés d’origina mexicana explica que i a fòrça actors qu’an la responsabilitat de la degradacion de las vièlhas bastissas, “tan publics coma privats”, mas que dins lo cas de la Carrièra d’Aubanha, la comuna a una responsabilitat màger:
 
“La vila de Maselha aviá aquerit dos d’aqueleis immòbles, alora dins aqueu sens es pron emblematic de çò qu’avèm pogut observar dempuei quauqueis annadas, qu’es que quand la vila de Marselha aquerís un ben immobilier, siá per crompa o per expropriacion, en generau, aquelei bastissas rèstan inocupadas e contunhan de se degradar pendent 5 ans, 10 ans, 15 ans sensa ges de reaccion de part dei poders publics”.
 
Per tant, cresèm que la comuna de Marselha, dirigida per son cònsol màger, Jean-Claude Gaudin, es dirèctament responsabla de la mòrt d’uèch de sos ciutadans. Mentretant, 100 000 marselheses son en perilh que lor ostal tombe. Aquò es un crime!
 
 


 

 

 

 


 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: JORNALET 2025

Comentaris

Pitaluga
1.

E lo Gaudin, que deuriá èsser dins la gàbia coma responsable, a pas demissionat encara ?

  • 5
  • 0

Escriu un comentari sus aqueste article