Lo movement dels Gilets Jaunes a causat un grand revolum social dins tot l’estat francés —e de rebucada dins la màger part d’Occitània—. E mai s'amb lo temps lo nombre d'estradas barradas es mendre, las accions de protèsta se multplican e de collectius de tota mena jonhon aquel movement, coma los estudiants. Aquel movement protèsta contra la pojada de las taxas suls carburants e sus las veituras, e d'autras mesuras de Macron qu'empaurisson mai encara los pus paures.
 
Semblariá que lo president Macron e lo govèrn de son primièr ministre aguèsson ensajat de far una experiéncia sociala, en cometent d'abuses contra la populacion per veire quin èra lo nivèl de resisténcia dels ciutadans, fins a passar l'òsca. Demest las mesuras que prepausa l'executiu d'Édouard Philippe i a una taxa sus las veituras pus vièlhas e cap per las gròssas cilindradas nòvas que polluisson mai. En mai d'aquò, es completament cinic de prepausar de taxas per evitar la pollucion sens vertadièra politica alternativa compensatòria, es pas en pagant ansin que polluirem mens. Es evident que seriá plan melhor de tornar las linhas de tren suprimidas e de far un investiment sul transpòrt public, insufisent dins tot l'estat francés, mai que mai en Occitània. Tanben nos poiriam demandar ont se produtz l'electricitat per las veituras electricas, per remarcar qu'es pas una alternativa ecologica, e sustot, perqué existís pas un acòrdi mondial sul carburant dels avions e de las naus, qu'es çò que mai polluís.
 
Dins aquel sens, lo movement dels Gilets Jaunes es pas cap d'autra causa qu'una alèrta de la societat que denóncia l'empauriment de la classa mejana e de l'entorn rural qu'an dich que pro es pro, après una tièras d'abuses subits ongan. Es una mobilizacion espontanèa que mòstra la fòrça dels rets socials, mas sustot es la mòstra que i a quicòm que truca.
 
Mas i a un chepic. Aquel movement, talament legitim e plen de rason, es un camp plen de tèrra fertila pels movements populistas, e trobam en cèrtas escasenças, demest tot aquel mond qu'amb lor gilet jaune exprimisson de revendicacions justas e realas, de faissistas que se fan remarcar en profechant de las protèstas per liurar de migrants amagats als gendarmas o obligar de femnas musulmanas de tirar lo vèl, per exemple. Es evident qu'aquela deriva serà aprofechada per deslegitimar lo movement e lo combatre. Ven als Gilets Jaunes de permetre pas que lors protèstas deriven en revendicacions parallèlas al servici dels interèsses politics de quin partit que siá, de drecha o d'esquèrra.
 

 

---

Montpelhièr: convergéncia entre los antisexistas e los Gilets Jaunes