L’associacion dels Amics de Jornalet ven de lançar sa campanha d’estiu per finançar aqueste quotidian en linha amb la tòca d’amassar 3000 èuros dins los tres meses a venir. Justament, qu’aqueste jornal siá totjorn drech e publicat cada jorn après sèt ans e mièg es un miracle qu’an rendut possible los legeires e la solidaritat dels Amics de Jornalet.
 
Jornalet es una publicacion en linha gratuita, sens constrencha de pagament ni soscripcion de cap de sòrta. Sèm fòrtament convencuts que la precarietat dels mèdias en occitan e nacionalament centrats sus Occitània es tan granda que o podèm pas complicar mai en fasent venir lo sit pagant. Sèm conscients qu’aqueste fach pòrta tòrt a Jornalet, mas portariá encara mai de tòrt a la comunicacion en occitan e a nòstres legeires. Se cal far de sacrificis, preferissèm de los far nosautres e non que los fagan los legeires.
 
Ça que la, vos volèm encoratjar a participar a collaborar amb los Amics de Jornalet. Tot l’argent que nos arribarà serà emplegat per assegurar un pichon salari pel cap-redactor e pel redactor-corrector e per finançar lo servidor d’Internet, las despensas bancàrias, las indemnitats per desplaçaments, los servicis de gabinet juridic... E mai fagam d’esfòrces per conténer tot aquò dins un budget minimal. D’autras intradas d’argent nos pervenon a travèrs de las ajudas de la Generalitat de Catalonha per la lenga occitana e de las pontualas insercions publicitàrias que son de mens en mens frequentas e generosas.
 
Un apòrt pontual de 10 o 25 o 50 èuros, segon las possibilitats de cadun, representa una ajuda màger per Jornalet e aquò nos encoratja a veire que nòstres legeires senton qu’aqueste jornal es lor e que velhan de manténer son avenir. De la meteissa faiçon que los legeires ja fan partida de nòstra vida, volèm que sentatz que, sustot, Jornalet fa partida de vòstra vida. De soslinhar que la campanha cèrca pas cap de don de las personas al caumatge, retiradas, estudiantas o que subisson un marrit moment financièr.
 
L’associacion Los Amics del Jornalet es legala dins la Republica Francesa e es nascuda al marge de Jornalet.  A per tòca de sosténer Jornalet, dins sas possibilitats, al nivèl economic e a l’ora d’ara, es la principala font de finançament d’aqueste jornal.
 
I a quicòm que volèm plan precisar: lo jornal que sètz a legir quitarà pas de paréisser cada jorn amb d’articles nòus e de nòvas opinions e quitarà pas d’èsser d’accès gratuit. La lenga occitana e l’espaci occitan de comunicacion son tròp fragils, uèi lo jorn, e i podèm pas metre mai d’obstacles. Aquí ont arribarà pas l’argent i metrem mai d’oras panadas a la familha, al sòm e al trabalh. Mas vos mercejarem plan se fasètz un gèst de solidaritat.
 
 
 

 

fffff		fffff
	Cossí collaborar a la campanha:   — Podètz mandar un chèc a l’òrdre de "Los Amics de Jornalet" a l’adreiça: 6 rue Victor Hugo / 11500 QUILLAN   — Podètz mandar un transferiment bancari al compte de la Caisse d’Epargne Languedoc-Rousillon o ben a la Caixa d’Enginyers (demandatz lo numèro de compte)   — Podètz mandar d’argent via Paypal en clicant aicí: paypal.me/amicsdejornalet   Daissatz vòstres noms e adreiça per recebre qualque exemplar de la revista de Jornalet en papièr. La còla dels Amics de Jornalet raportarà regularament l'estat de la campanha sus la pagina Facebook qu'a aviada per aquela tòca.