Un dels elements pus importants del contraròtle social es l’estrategia de desviar l’atencion de l’opinion publica dels problèmas importants. De còps, es acompanhada per un boc emissari cargat de tota la colèra dels ciutadans. Aquelas estrategias, emplegadas tròp sovent per l’extrèma drecha francista jacobina, an menat la societat francesa devèrs una islamofobia inquietanta que la patisson mai que mai las femnas, las mai vulnerablas del collectiu de tradicion musulmana. Aquel racisme a quitament tocat l’occitanisme e d’autres movements de liberacion sociala o nacionala.
 
Mentre que l’afar dels Gilets Jaunes se perennza sens solucion e que los dreches civils e socials son de mai en mai violats per la repression de l’estat, e mentre que çò que se passa en Rojava, Chile o Catalonha poiriá portar de problèmas a l’ultradrecha que cèrca de s’installar en Euròpa, l’usatge del cairat torna venir al centre del debat public. L’usatge d’aquel vel per cèrtas femnas que fan partida dels collectius pus marginalizats del país es ara, en França, al centre del debat public, e se parla de n’enebir lo pòrt a las dònas qu’acompanhan las sortidas escolaras. De partisans afogats de la laïcitat de l’estat francés exigisson la meteissa neutralitat a las acompanhantas qu’als foncionaris.
 
D’interdire lo pòrt d’un vestit o d’un complement vestimentari que marca una cèrta cultura o tradicion religiosa es, sens cap de dobte, lo biais pus eficaç d’empachar l’integracion de tot aquel collectiu. E es justament aquò que lo Recampament Nacional vòl. Aquel movement politic se noirís del racisme e de l’intolerància, per tant a de besonh del conflicte social e cultural. Se los ciutadans d’autras originas culturalas que las autoctònas se sentiguèsson plan en cò nòstre e i aguèsse una bona convivéncia, la còla de Marine Le Pen aurián pas tantes vòtes. Per tant, lor cal totjorn noirir la marginalizacion dels ciutadans qu’an d’originas migrantas.
 
Çò de pus grèu es que s’ataca las femnas, que ne son la partida pus reprimida e marginalizada. Dins los entorns ultratradicionalistas se pòdon trobar obligadas de cargar lo cairat. E ara pòdon patir l’enebicion de lo portar de part dels integristas de la laïcitat. Atal, reprimidas d’un costat e de l’autre, finiràn que seràn forçadas de demorar dins lors ostals e poiràn quitament pas trabalhar.