Raportam uèi sus Jornalet una detencion inquietanta en Occitània. An detengut e mes en gàrdia a vista, pel tresen còp, Alexander Samuel, un jove doctor en biologia de Grassa resident a Niça, conegut per far una enquista suls efièches dels gases lacrimogèns sus la santat e per son accion coma mètge de carrièras durant las protèstas dels Gilets Jaunes. Lo 26 d’octòbre passat, foguèt plaçat en gàrdia a vista del temps que perquisicionavan son lotjament e emportavan tot son material informatic, sos ordenadors, sas claus USB e tot çò que conteniá d’informacions essencialas sus sas recèrcas a l’entorn dels efièches dels gases lacrimogèns sus la santat. Aquel material restèt qualques jorns en cò de la polícia quand Samuel foguèt liberat sens cap de carga ni explicacion. Avèm paur qu’aquesta detencion siá restacada a sas activitats de recèrca a l’entorn dels efièches dels gases lacrimogèns emplegats per las fòrças de l’òrdre francesas contra los manifestants.
 
En Catalonha, i a actualament un quinzenat de presonièrs politics: son los presidents de doas associacions ciutadanas, la presidenta d’un parlament per aver permés un debat e totes los membres del govèrn regional que partiguèron pas en exili. E mai i a sèt personas embarradas dins una preson de Madrid dempuèi mai de 40 jorns en regim antiterrorista, isolats, que passan 20 oras per jorn dins una cellula sens lum ni lutz e que pòdon pas parlar amb degun. Lo 24 d’octòbre passat, quitèt d’èsser secreta l’instruccion de lor procès judiciari e tre alavetz s’es confirmat que lor an pas descobèrt cap d’arma, cap d’explosiu, cap d’apertenéncia a una organizacion criminala, cap de plan de cometre d’atemptats... pas res. Ça que la, demòran embarrats dins aquelas condicions espaventosas.
 
En Bascoat, tanben patisson aquela repression. Sèt gojats e una gojata de la vila d’Altsasu son empresonats dempuèi mai de dos ans per una bagarra nocturna de bar qu’i participèron dos policièrs de la Gàrdia Civila sens unifòrme. Los an condemnats a de penas de fins a 13 ans de preson per de supausats delictes d’atemptat contra d’agents.
 
Hong Kong, l’Eqüator, Chile, Haití, Argeria, Catalonha... de protèstas popularas contra las inegalitats, las injustícias e la repression se tenon pertot coma al nòstre e dins tot l’estat francés amb los Gilets Jaunes. E totas las administracions de totes aqueles endreches an reagit del meteis biais: pas de dialòg, pas de politica mas de repression e de manipulacion dels mèdias, de detencions illegalas, d’abuses del poder e e d’atacas dels policièrs contra la populacion en causant fòrça patiment, de nafraduras grèvas, de caps e de mans trencadas e quitament la pèrda d’uèlhs.
 
Los governants pels quals avèm votat e que vivon de nòstres impòstes son pas a nòstre servici. Aquò fa longtemps qu’o aviam constatat. Mas ara sembla que nos ajan declarada la guèrra.
 
 
 

---

Per sas recèrcas, Alexander Samuel aguèt lo sosten de tres mètges e lo consentiment de qualques manifestants que li donèron de mòstras de lor sang. La tòca de son trabalh es de demostrar qu’aquelas personas an patit d’exposicions perilhosas al cianur. De notar que Samuel es tanben perseguit per aver realizat de prelevaments de sang mas ara per ara a pas recebut cap d’instruccion judiciària.