Lo 14 de novembre passat, aqueste jornal publicava amb grand plaser que la Seleccion Occitana de Fotbòl s’alestís per l’Europeada 2020, la competicion europèa de fotbòl de las minoritats ont Occitània es representada, gràcias al remirable talent de l’Associacion Occitana de Fotbòl (AOF), que dempuèi maitas annadas trabalha per jónher tot lo país dins una meteissa esquipa e dins un meteis esperit. “Un país, una lenga, un pòble”, coma es escrich sus la camiseta oficiala de la seleccion.
 
L’Europeada 2020 se tendrà del 20 al 28 de junh de 2020 en Caríntia, l’estat del sud d’Àustria que ten una importanta minoritat eslovèna. A las meteissas datas se tendrà tanben l’Eurocopa dels estats, e de milions d’occitans seràn plan atentius a las partidas e, sens cap de sòrta de dobte, l’immensa majoritat sostendràn “los blaus”. Del meteis biais, en Aran maites donaràn lor supòrt a l’esquipa d’Espanha del temps que dins las Valadas se sostendrà Itàlia. D’autres occitans tot simplament ignoraràn l’eveniment, perque lor agrada pas lo fotbòl o almens aquela competicion.
 
Mas en aquela escasença volèm far una crida a venir totes d’afogats de la seleccion occitana de fotbòl. Per un còp, lo país del rugbi deu venir fotbolaire, en sostenent l’AOF, en ajudant la seleccion nòstra (qu’a cada competicion fa de bons resultats) e en  seguissent l’Europeada. Nòstra seleccion nacionala de fotbòl merita mai d’atencion de la part de totes: dels afeccionats, dels mèdias e de nòstras institucions. Nòstres jogaires devon percebre un país que reagís rapidament a cada partida e una nacion esmoguda a cada gòl. Los occitans nos cal èsser melhor informats, nos cal seguir nòstra esquipa e, se podèm, nos cal desplaçar per veire las partidas. Es imperatiu qu’epeliscan per tota Occitània de grops de suportaires organizats que fagan bolhir lo país. Devèm festejar las reüssidas e las comentar sus Twitter, sus Facebook, al bar, al trabalh, per carrièras... Son paucas las escasenças de rendre visibla Occitània dins lo Mond, non pas coma una region de França amb un logotip e una marca toristica mas coma un país que vòl viure, dels Alps als Pirenèus. Nòstra esquipa nacionala de fotbòl n’es una excellenta ocasion.

        
    

fffff		fffff
	L’Associacion Occitana de Fotbòl (AOF) demanda lo sosten del país. De jogadors, d’ancians jogadors, de suportaires, de cosinièrs, de massaires e quina persona que siá son cridats a sosténer la Seleccion. Tanben se pòt ajudar amb un escotisson de 30 èuros deductible dels impòstes a un 66%.   Dins aquel sens, lo 4 de genièr se farà près de Besièrs un rescontre per coordenar totes aqueles sostens e per presentar l’an 2020. Es previst un tantòst-serada amb d’activitats culturalas, esportivas e convivialas. La còla de Jornalet ensajarem d’i èsser.   Per mai d’informacions podètz contactar Aimeric Amiel per e-mail o al +33(0)6 83 82 21 80.