Coma o raportàvem dins Jornalet, dijòus passat, la Cort de Justícia de l’Union Europèa en Luxemborg prononcièt la senténcia que l’elegit e presonièr politic catalan Oriol Junqueras ten l’immunitat coma eurodeputat. E mai la Cort Suprèma espanhòla lo condemnèsse a 13 ans de preson per sedicion, segon los jutges europèus Junqueras deviá èsser liberat de la preson preventiva lo 26 de mai quand foguèt elegit deputat europèu. Per tant, aquela decision pertòca tanben lo president en exili, Carles Puigdemont, e l’elegit Toni Comín, tanben exiliat. Los dos foguèron tanben elegits eurodeputats lo 26 de mai passat e avián ja demandat a aquel meteis tribunal que lor foguèsse permés d’exercir coma tals. Tanlèu que la cort de Luxemborg aguèt prononciat sa senténcia,  i reagiguèt lo president del Parlament Europèu, David Sassoli, qu’exigiguèt de las autoritats espanhòlas qu’executèsson la senténcia del temps que demandava als servicis de l’eurocambra qu’analisèsson los efièches d’aquesta sus la reconeissença de Puigdemont e Comín, e l’endeman los dos elegits catalans en exili èran dins l’eurocambra per prene lors acredicions coma eurodeputats. La decision de la justícia europèa es pas executòria e sembla que la justícia espanhòla vòlga pas liberar Junqueras. Pasmens, aquel verdicte representa una revirada de las bèlas per las autoritats espanhòlas e tanben per l’èx-president del Parlament Europèu, Antonio Tajani, qu’aviá decidit de mancar als dreches dels electors e de violar los de Puigdemont e Comin en lor enebissent quitament l’accès a l’eurocambra.
 
La senténcia de la Cort Europèa, e sustot l’imatge de Puigdemont e Comín que mòstran lors acreditacions de deputats europèus, a provocat de reaccions furibondas dins los mèdias de Madrid del temps qu’espelissiá la campanha de l’Spexit que demandava qu’Espanha quitèsse l’Union Europèa. Justament, aquel espanholisme que pretendiá d’avisar Catalonha que quitariá l’UE se veniá independenta, vòl ara quitar l’UE per poder reprimir los catalans amb impunitat totala. Mentretant, sembla que foguèt una bona idèa la qu’aguèt una part del govèrn legitim de Catalonha de s’exiliar e d’internacionalizar lo conflicte politic.
 
Pareis que la justícia espanhòla a pas cap d’intencion de tornar metre Junqueras en libertat. Segon la cort que lo condemnèt a 13 ans de preson, la senténcia europèa fa referéncia al moment de la preson provisòria e ara la condemnacion es definitiva. Dich en d’autres mots, Espanha a decidit de manténer sequestrar un eurodeputat e sembla que la Comission Europèa farà pas res per lo socórrer. Pasmens, la preséncia de Puigdemont e de Comín dins las sesilhas del Parlament Europèu e l’abséncia de Junqueras serà una remembrança constanta a totes los ciutadans que dins l’Union Europèa se permet qu’un país viòle los dreches umans e tenga de presonièrs politics.
 
Totun, la senténcia que la prononcièt la Cort de Justícia de l’Union Europèa dijòus passat representa un pas endavant considerable, non solament per las libertats dels catalans, mas per la democracia. E mai constituís una revirada de las bèlas contra aquela politica europèa del liberalisme extrèm al servici dels mercats e de las bancas que cèrca non solament la liquidacion de las culturas e dels pòbles minorizats coma lo nòstre, mas que tanben met en question nòstras pensions de retirada.