Comença una nòva annada e coma d’abitud es ora d’exprimir los bons vòts per l’an 2020. La còla de Jornalet esperam que serà un bon an per Occitània. Volèm que se dobrisca.mai de calandretas e mai de classas bilinguas dins las escòlas publicas. Esperam que creisserà la senhalizacion en occitan e qu’aumentaràn los corses d’occitan per adultes. Volèm que las eleccions municipalas se tradugan per un màger nombre d’elegits occitanistas dins las comunas del país; se se pòt faire, esperam de n’aver mai que jamai. Desiram que lo caumatge davale, que las perspectivas economicas se melhoren e que l'ÒPLO decidisca enfin de finançar los mèdias en lenga occitana.
 
Per quant a França e son govèrn, n’esperam puslèu paucas causas, mas cresèm d’aver rason d'exigir qu’abolisca la Reforma Blanquer, que ratifique la Carta Europèa de las Lengas Regionalas e Minoritàrias e que rectifique sas politicas lingüicidas e culturicidas en tot reparar lo mal fach. Tanben volèm que quite de vendre d’armas, mai que mai a l’Arabia Saudita que son conflicte amb Iemèn es qualificat per l’ÒNU de “pièger crisi umanitària de nòstre temps”.
 
A prepaus de l’estat espanhòl, esperam que se virarà devèrs la democracia e qu’aquel conflicte politic qu’el ten amb Catalonha se resolverà amb de dialòg e pas pus amb de tribunals, de presons, de repression, de montatges e de messorgas.
 
E nos cal reconéisser qu’esperam sustot de veire coma Aran, un país occitan, vendrà enfin lo far d’una Occitània mens alienada e mai liura e sobeirana. Dins aquel sens, volèm jónher las revendicacions de la deputada aranesa Anna Geli e sas paraulas quand diguèt: “Demani ath govèrn dera Val d’Aran que se posicione a favor, o coma minim, ath cant des catalans que son eri es que mos auetz reconeishut pendent fòrça ans”. Cal puslèu prene en compte qu’es lo Parlament de Catalonha qu’a reconegut lo drech a l’autodeterminacion del pòble aranés e l’oficialitat de la lenga occitana, e que foguèt la Generalitat de Catalonha que restaurèt lo Conselh General d’Aran 157 ans après que l’estat espanhòl l’aguèt abolit.
 
Enfin, demandam al govèrn aranés que vire pas l’esquina a la rèsta del país occitan e que permeta que lo pòble aranés aja l’accès complet a tota sa lenga e cultura, mai que mai aqueste an 2020 que commemorarem los cent ans de la naissença de Joan Bodon, un dels màgers escrivans en lenga nòstra.