La vila alemanda de Hanau, en Èssa, es estada lo scenari d’un masèl qu’a daissat onze personas mòrtas, dont lo tuaire, e d’autras cinc nafradas grèvas. O raportàvem espantats divendres passat. Esglasiats per la gravetat del crime, esglasiats pel fach que lo mobil del crime siá lo racisme ultradrechista e esglasiats per la cobertura minimala que n’an facha los mèdias. Fòra d’Alemanha i a pas agut d’acamps de protèsta, ni de minutas de silenci... res. Tot aquel mond que foguèron Charlie? Ont son?
 
Lo tuaire, Tobias Rathjen,daissèt fa gaireben una setmana un vidèo sus Youtube ont afirmava, en anglés, qu’Alemanha es un país contrarotlat pels servicis secrets. S’agís d’una afirmacion que dison de longa los collectius neonazis del país, que sostenon qu’Alemanha es governada per las poténcias que ganhèron la Segonda Guèrra Mondiala. A mai, apond que lo país es somés a la “criminalitat estrangièra”, que l'identifica amb los migrants de tradicion musulmana, valent a dire, mai que mai, los turcs e los arabis. “La percaça dels migrants poiriá èsser una solucion perque l’existéncia de grops etnics estrangièrs es una error fondamentala”, çò assegura. Una tèsi que tanben sostenon en cò nòstre los paranoiacs del “grand remplaçament”. E maites occitans i creson, s'agacham los vòtes qu’obten l’extrèma drecha en Occitània, e mai lo grand remplaçament lingüistic e cultural present e evident venga solament de París, Madrid e Roma.
 
Las victimas èran de curds, tuats per un faissista que los prenguèt per de turcs. Podèm pas imaginar una mòrt pus umilianta causada per un baug qu’a cregut fins a l’extrèm un discors d’un movement politic qu’obten de mai en mai de vòtes en Alemanha, coma se passa tanben en cò nòstre. Çò qu’es inquietant, es que los partits d'aquela mena sián legals e pòscan presicar l’asirança amb impunitat.
 
La causida de las victimas, dins dos locals amb de salas abilitadas per fumar amb de narguiles, seguís una obsession que la presica sovent lo partit Alternativa per Alemanha, d’extrèma drecha populista; aquela sòrta de locals serián pas res mai que de ponches d’amassada de la comunautat turca.
 
Un detalh important. Tobias Rathjen s’es pas solament confessat islamofòb mas tanben masclista. En mai del vidèo, daissèt un manifèst de 24 paginas ont se confessava “incel” e afirmava que pendent 18 ans aviá pas agut cap de relacion amb cap de femna e las en culpabiliza. Los autonomenats “incels” creson que lo Mond es injust amb los òmes eterosexuals pauc atractius, e cèrcan de sosten anonim dins los forums d’Internet o suls rets socials. S’agís d’òmes que sovent denigran las femnas e lo feminisme, e tanben las personas qu’an una vida sexuala activa. Los mai extremistas defendon los viòls e d’autras formas de violéncia contra las femnas.