Jornalet celèbra aquestes jorns lo sieu primièr cambiament d’an. Nasquèt en març de 2012 e a capitat d’arribar a la fin de l’annada, aquò es quicòm. Maites projèctes, mai que mai jornalistics, supèran pas los primièrs meses de vida perque l’estrambòrd e lo vam inicials acipan sul pic la rotina e la fatiga, sustot se se va, coma es lo cas, a contracorrent. Mas avèm subreviscut pendent los primièrs nòu meses de vida e podèm dire, amb una cèrta objectivitat, que la majoritat dels enjòcs del nòstre jornal se son complits e que Jornalet es arribat al Mond per i demorar.
 
Es per aquò que volèm far publics los nòstres desirs per l’an que comença. E o anam far, primièr, amb los desirs que van al delà d’aqueste jornal. Desiram que los nòstres governants occitans de mentalitat francesa fagan un pas per assumir sens cap de complèxe la lor condicion de governants occitans. A respècte dels nòstres governants occitans de mentalitat occitana, lor desiram que suspendan las lors diferéncias legitimas e que trabalhen ensems per la causa que los jonh, e a l’encòp lor demandam tanben que sián mai soples e mens intransigents per ajustar mai de personas dins aquel grand movement nacional qu’es l’occitanisme. Desiram tanben a las fòrças occitanas que luchan sus lo terren de la cultura que trabalhen amb mai de suènh, en sonhant sustot la qualitat abans la quantitat. Una cultura normalizada es aquela que produsís de bons produches culturals per donar un bon imatge d’ela meteissa. Nos conven benlèu de sonhar e calinhar mai los nòstres libres, revistas, disques, espectacles, concèrts e conferéncias, per los far de melhora qualitat, e mai s’aquò supausa una petita baissa del nombre absolut de produches culturals.
 
En çò que tanh a nosautres, tanben nos comandam de devers. Desiram amb tota la nòstra energia, l’an que ven, que l’espaci occitan de comunicacion siá mai fòrt e amb una complicitat màger. Desiram que los nòstres articulistas e opinants sián mai sonhoses amb la lenga e amb lo lengatge jornalistic e opinatiu. Desiram, sustot, que los nòstres legeires qu’escrivon de comentaris sián mai respectuoses amb los autres legeires e amb los autors dels articles. La fòrça de la rason se mesura pas jamai amb l’intensitat dels adjectius. E desiram, tanben, que de nòus entrepreneires e de nòvas institucions occitanas sostengan lo nòstre jornal amb qualque anonci publicitari, coma o fan ja d’autras entrepresas e institucions que creson a aqueste petit grand país nòstre que s’apèla Occitània.
 
Bona annada, plan granada e acompanhada!