capçalera campanha

editorial

“Vergonha, indignacion e paur”

A Pampalona an protestat fòrt quand l'armada a pres las carrièras en fasent sonar l'imne espanhòl
A Pampalona an protestat fòrt quand l'armada a pres las carrièras en fasent sonar l'imne espanhòl | @Antifaxismoa
Publicàvem dimècres passat —e aquò èra pas un peis d’abril— que l’armada espanhòla s’èra gandida en Aran per desinfectar qualques installacions del país occitan de cap de Garona, a la demanda del sindic, Paco Boya. D’efièch, l’Unitat Militara d’Emergéncias (UME) jòga un ròtle especial dins l’estat espanhòl en aquestes jorns de crisi sanitària en fasent de desinfeccions mai mediaticas qu’eficaças en maites endreches de l’estat. De pompièrs an plangut aquelas manòbras en denonciant que lo naut còst d’aquela UME poiriá finançar un aument de 3500 personas de l’efectiu als pompièrs, que son los que vertadièrament se tròban tostemps davant las situacions d’urgéncia, e mai sián pas davant las camèras.
 
La prestigiosa fondacion alemanda Konrad Adenauer ven de publicar un rapòrt fòrça critic amb la gestion que l’efectua lo govèrn espanhòl de Pedro Sánchez davant la pandemia de Covid-19. Lo rapòrt mençona lo retard a confinar la populacion, e mai los presidents de Catalonha, de las illas Balearas, del País Valencian e del Bascoat o demandèsson; parla de l’organizacion de conselhs de ministres amb l’assisténcia de mond qu’an de contacte amb d’infectats, l’enòrme aument del caumatge, los mai de 600 000 tèstes defectuoses crompats per l’estat (qu’adès ne ven de crompar encara un milion de mai que son aitant inutils); soslinha la manca de recorses e de material del personal sanitari, los cadavres trobats dins las residéncias de retirats... Se critica tanben que lo govèrn de Sánchez destine mai de ressorsas a la propaganda qu’a la gestion de la crisi e qu’aja recentralizat lo poder en donant a l’armada lo primièr ròtle.
 
A Barcelona, los mètges denóncian que devon partejar de mascas de proteccion. L’associacion dels infirmièrs a demandat al president Sánchez se sentís pas “de vergonha, d’indignacion o de paur” en veire lo personal expausat a la Covid-19 cada jorn. Los govèrns de Catalonha e del Bascoat critican aquela recentralizacion que los empacha d’agir amb responsabilitat e eficacitat. Davant una situacion catastrofica, las autoritats localas pòdon sonhar melhor la populacion que non pas d’estructuras burocraticas, verticalas e centralizadas. O remarquèrem dins los aigats de 2013, ont del costat aranés i aguèt pas cap de mòrt gràcias a la bona gestion que la faguèt lo Govèrn d’Aran. Davant una situacion pandemiologica, cal donar l’autoritat als mètges e als scientifics. L’estat espanhòl, totun, a recentralizat —a la francesa— tota la gestion e a mes endavant las autoritats militaras per gerir la crisi e a entamenat una operacion de propaganda patriotica que s’èra pas jamai vista dempuèi l’acabada de la dictatura.
 
E çò que ven de passar l’òsca es la subvencion de quinze milions d’èuros que se ven de donar als dos grands grops mediatics de l’estat, qu’en 2019 declarèron un profièch de 211 e 118 milions d’èuros respectivament. De l’exili estant, Carles Puigdemont a demandat a la Comission Europèa que faga una enquista sus aquel “don”, qu’es mai que probable que siá per sosténer tota la propaganda mediatica entamenada per l’executiu espanhòl del Partit Socialista, partit qu’ara govèrna lo Conselh General d’Aran.
 
Davant una situacion talament catastrofica e mortala coma la que sèm a viure, es pas lo moment de criticar mas lo de collaborar en ajudant o demorant a l’ostal. O sabèm ben e dins aquel sens sèm fòrça reconeissents als rets ciutadans que se son creats per ajudar los febles, los mètges e tot lo personal sanitari, los pompièrs, lo personal del netejatge, los trabalhadors de l’alimentacion e tot lo mond que riscan lor santat per que poscam demorar en confinament amb seguretat e provesits de tot çò que cal. Es pas lo bon moment per criticar, mas la gestion que la realizan las autoritats europèas, francesas, italianas e espanhòlas nos fa sentir çò que denonciavan los infirmièrs espanhòls: “de vergonha, d’indignacion e de paur”.


   
 
 

abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article