Aqueste quotidian en linha que sètz a legir se finança mai que mai amb la collaboracion de sos legeires. Nasquèt en març de 2012 gràcias a la generositat de dos mecènas que cresián al projècte, e tanben gràcias la publicitat institucionala de tres collectivitats importantas. Amb lo temps, trobèrem lo biais d’obténer un petit salari modèst per las personas qu’i trabalhan cada jorn gràcias a la naissença de l’associacion Los Amics de Jornalet e de la linha de subvencions per la promocion de l’occitan de la Generalitat de Catalonha.
 
Ongan, avèm patida una crisi sens precedents que nos a fach trabalhar sens cap de salari dempuèi lo mes d’abril. Ça que la, avèm pogut pagar los fornidors e los impòstes gràcias a la solidaritat dels Amics de Jornalet.
 
La darrièra campanha de finançament solidari menada a bon tèrme se lancèt per dos meses lo 14 de julhet. Sa tòca èra d’amassar 2000 èuros en dos meses, e avèm recebut mai del doble:



 

— Dons mandats a l’associacion Amics de Jornalet:	2500 èuros
— Dons mandats dirèctament a la redaccion:	770 èuros
— Dons mesadièrs dels legeires via PayPal:	164 èuros
— Publicitat de l’Institut d’Estudis Occitans d’Arièja:	200 èuros
— Total:	4034 èuros

 
 
De soslinhar la proposicion de l’IEO d’Arièja de nos ajudar en pagant una publicitat, una iniciativa que saludam plan. Tanben volèm soslinhar lo fach qu’una legeira abituala prepausèt de nos pagar las crompas al supermercat pendent lo periòde de crisi. E mai se poguèrem subreviure sens besonh d’acceptar aquela ajuda, la proposicion nos arribèt al fons del còr.
 
Mercés plan a totes los que nos avètz mandat d’argent, de messatges de solidaritat, de vam... e tanben mercés als qu’avètz partejat los articles publicats, qu’avètz prepausat d’articles per publicar, que nos avètz donat d’idèas, qu’avètz fach virar la campanha de sosten e n’avètz parlat endacòm...
 
Gràcias a totes vosautres, aqueste quotidian occitanofòn quitarà pas de paréisser cada jorn amb d’articles nòus e de nòvas opinions e quitarà pas d’èsser d’accès gratuit. La lenga occitana e l’espaci occitan de comunicacion son tròp fragils, uèi lo jorn, e i podèm pas metre mai d’obstacles. Ont arribarà pas l’argent i metrem mai d’oras panadas a la familha, al sòm e al trabalh. L’enòrma solidaritat dels legeires cèssa pas de nos donar de vam e de fòrças.
 
Mercés plan!