Un còp de mai avèm manifestat per la lenga. Un còp de mai avèm revendicat un estatut per las lengas autoctònas e mespresadas de l’estat francés, l’extension de lor ensenhament e lor desvolopament dins l’espaci public. Mentretant, l’administracion francesa se’n trufa e lo govèrn de Macron seguís ara la meteissa politica lingüistica qu’en 1970, 1950, 1930 e que l’8 de pluviós de l’an II. La nòstra lenga, e totas las autras que manifestèron dissabte, son de victimas d’una politica estatala premeditada que pensa pas de cambiar, que pensa de contunhar d’agarrir, e qu’es convencuda que l’eliminacion de nòstras lengas e de nòstras culturas fa partida de las valors de lor “Republica”.
 
L’idèa del collectiu “Per que viscan nòstras lengas” es bona, car nos permet d’unir nòstras fòrças fàcia a una reforma de l’educacion que nos pertòca e nos grèuja a totes. Ça que la, nos trobam un còp de mai a ensajar de convéncer una republica que ten per valors nòstra eliminacion. Es benlèu ora de traversar las frontièras estatalas e de bastir de ligams amb los collectius de lengas minorizadas d’endacòm mai per denonciar a las instàncias internacionalas los castigs, lo mesprètz e las umiliacions que los patís nòstre pòble pr’amor non sonque de la lenga que parlam o que parlavan nòstres aujòls, mas tanben de l’accent quand parlam en francés.
 
Aqueste dimenge, a la una de Jornalet raportam cossí divèrses collectius de las minoritats ongresas de Romania e Eslovaquia an jonch de collectius bascos e catalans e ensems cèrcan de sostens per registrar a la Comission Europèa una iniciativa ciutadana qu’acòrde una atencion particulara a “las regions que presentan de caracteristicas nacionalas, etnicas, culturalas, religiosas o lingüisticas que son diferentas de las de la regions de l’entorn”. Las iniciativas internacionalas d’aquela mena l’occitanisme las deuriá pas mancar.
 
 

---

P.S. Mentretant, nos assabentan que la Topina ven de barrar. Tolosa ven de pèrdre un endrech ont se podiá manjar, beure e viure en occitan naturalament e normalament. Es una catastròfa. Esperam de poder revirar aquela situacion: que lèu torne dobrir la Topina, que s’inaugure de “topinas” long de tot lo país e que n’i aja totjorn que mai fins al jorn que parlar occitan dins los bars del país siá tornar quicòm de normal.