Dempuèi los atemptats contra Charlie-Hebdo en 2015, cap d’estat europèu es pas estat atacat del biais qu’o patís l’estat francés, e Occitània de rebucada. Darrièrament, sèm a patir una autra represa de l’orror, ara de la man de gojats fòrça joves qu’an lo mestratge e la preparacion fisica e mentala per assassinar d’un biais mostrós sonque amb un cotèl. Après l’assassinat d’un ensenhaire près de París e l’orror de dijòus a Niça, ne podèm conclure qu’es dins l’estat francés que lo terrorisme islamista ten lo terrenh pus adobat per convéncer, radicalizar e entraïnar de joves jihadistas.
 
D’un caire, França es l’estat europèu amb lo nombre pus naut de populacion de fe o de tradicion musulmana. De l’autre, es tanben lo país mai intolerant envèrs l’interculturalitat. Del meteis biais qu’ataca las lengas e las culturas autoctònas autras que la sola oficiala, ensaja d’assimilar e desculturar las populacions arribadas pendent los darrièrs decennis, majoritàriament sortidas de las ancianas colònias. En consequéncia, i a tot plen de descendents d’aqueles migrants que se veson encalats dins las banlègas, estigmatizats e sovent victimas del racisme.
 
Ara, los ciutadans son indignats pels crimes terroristas. E an rason. Mentretant, lo president Macron prepausa de combatre lo “separatisme” islamista e d’agir contra los que refusan las valors de la “Republica”. Dich d’una autra manièra, vòl far créisser l’afrontament de las culturas e nos barra totjorn que mai l’esperança de recobrar un país de libertat e de convivéncia. Caduna d’aquelas atacas terroristas genèra d’islamofobia e l’estat e los mèdias la noirisson. De remarcar las matinalas de divendres, l’endeman de l’atemptat de Niça: Manuel Valls sus LCI, Christian Estrosi sus Europe 1 e Marine Le Pen sus BFM TV.
 
Après cada atemptat jihadista, puèja l’islamofobia. E en consequéncia i a mai de “separatistas” segon lo sens macronian del mot. Per tant, après cada atemptat creis lo nombre de joves susceptibles de tombar dins lo discors de l’òdi jihadista.
 
 
Cui prodest? A qual profiècha lo crime?
 
Mas es pas sonque l’òdi jihadista que profiècha de sos pròpris crimes. Sèm ja abituats que de politicians sens escrupuls aparescan just après cada atemptat terrorista e profièchen de las emocions dins lor interès. A mai, ara Turquia es apareguda sus scèna. Lo politològ neerlandés Joost Lagendijk assegura que lo president turc, Recep Tayyip Erdoğan, a vist ara l’escasença de se proclamar lidèr dels sunnitas davant los musulmans d’Euròpa del temps Macron se proclama lo defensor de la libertat d’expression, de la laïcitat e de las vertadièras valors de la “Republica”. Segon Lagendijk, tant Macron coma Erdoğan an de problèmas intèrnes e son contents d’aver trobat un enemic exterior a combatre politicament del temps que Geert Wilders e Marine Le Pen profièchan dels crimes per alucar lo racisme que presican.