Començam la novena annada de Jornalet amb l’idèa de contunhar e d’anar pus luènh, malgrat las dificultats. Sèm pas las personas mai apropriadas per o dire, mas avèm la percepcion que per fòrça occitans, legir aqueste quotidian es una abitud de cada jorn o de cada setmana. Aquò es justament la tòca que tot mèdia cèrca e podèm doncas afirmar qu’avèm atench una partida importanta de nòstra tòca.
 
Cresèm qu’es arribada l’ora de se modernizar un pauc mai e sèm a trabalhar sus un nòu sit fòrça mai revolucionari que permetrà de melhoras navigacion e lectura de las paginas Jornalet amb los ordenadors, tauletas e telefòns intelligents, e tanben una interaccion plan superiora. A mai, s’amodarà un sistèma per metre fin a las marridas practicas de certans legeires amb los mecanismes de participacion (comentaris anonims, adreiças e-mail falsas, manipòla dels sistèmas de vòte, etc.).
 
Mas volèm pas alestir definitivament lo sit nòu sens lo vejaire dels legeires. A mai, nos agradariá de vos presentar las activitats de las associacions que rendon possible aqueste quotidian, las finanças, los projèctes... e tanben amassar d’idèas, de suggestions, de proposicions de melhorament e tot çò que caldrà per far en sòrta que Jornalet siá un jornal de totes e per totes.
 
Per tant, avèm prevista una assemblada de legeires de Jornalet en linha, per dissabte 6 de febrièr a partir de 15 oras per videoconferéncia. Los que voldretz participar sètz pregats de nos escriure a info@jorn... e vos mandarem l’òrdre del jorn e totas las informacions que cal per se connectar.