Vegèrem estabosits dimècres passat coma una molonada de partisans de Donald Trump assautavan armats lo Congrès dels Estats Units per empedir la certificacion dels vòtes dels grands electors, que deviá permetre d’investir Joe Biden president. Los elegits foguèron evacuats e la sesilha se suspendèt durant maitas oras. Lo bilanç ne foguèt de 4 mòrts, de 14 nafrats e d’una centena de detenguts. Delà la gravetat dels faches e de lors consequéncias, dins aqueste editorial volèm analisar lo perfil dels assalhidors e denonciar los parallèls interessats que los an traçats divèrsas autoritats.
 
Los imatges de l’assaut an mostrat de coneguts caps dels Proud Boys, un grop d’òmes supremacistas blancs classat per la Liga Antidifamacion dels Estats Units coma de racistas, d’antisemitas, de transfòbs e de militants radicals antiimmigracion. I aviá tanben de membres d’autras milícias ultradrechistas coma lo Three Percenters e l’organizacion Unite the Right qu’an aquerit de vam pendent lo mandat de Trump, mai que mai pendent las protèstas del movement antiracista Black Lives Matter. Avèm tanplan vist la preséncia dels Oath Keepers, un grop parapolicièr supremacista, qu’èran aquí dimècres per “garentir” la seguretat dels agressors trumpistas e los protegir “dels enemics estrangièrs e nacionals”, çò disián dins un comunicat.
 
A mai, los imatges qu’an mai atracha l’atencion son los de Jake Angeli, un òme abilhat amb una casqueta de bison e doas banas que manca pas jamai cap de manifestacion en favor de Trump. S’agís d’un actor falhit qu’es ara un dels principals promotors del grop conspiracionista ultradrechista QAnon segon lo qual una guèrra secreta auriá luòc entre Donald Trump e d’elèits implantats dins lo govèrn, los mitans financièrs e los mèdias que cometrián de crimes pedofils e satanics.
 
Pasmens, a l’ora de far lors avaloracions publicas d’aqueles eveniments, las autoritats de China n’an profechat per dreiçar un parallèl entre la situacion a Washington e las manifestacion pròdemocracia a Hong Kong, Emmanuel Macron los a comparats amb los Gilets Jaunes e un fum de politicians espanholistas an traçat dins los mèdias de parallelismes amb lo movement independentista catalan.
 
N’avián pro de condemnar los eveniments de Washington. Mas, non, an volgut beneficiar de la situacion en generant mai de fake news. E atal, en dreiçant aqueles parallèls, tant las autoritats chinesas coma los elegits franceses e espanhòls an fach un populisme tan poirit coma aquel de Trump suls rets socials qu’a donat de vam a totes aqueles grops de faissistas, d’ultradrechistas, de conspiracionistas e de tròls qu’an portat a la societat estatsunidenca una situacion sociala de mal apasimar.