Al començament de febrièr, Joan-Marc Leclercq fasiá una crida, dins sa tribuna d’opinion, per amassar de mond que se metèsson al trabalh per un domeni .occ per la lenga e la cultura occitanas. Es una tòca possibla e seriá, sens nat dobte, una capitada de las bèlas pels occitans e pel respècte de la diversitat.
 
L’ICANN, l’organisme independent internacional que gerís los domenis d’Internet, a autrejat lo domeni .bzh per la cultura e la lenga bretonas, tant coma per d’autras questions restacadas amb Bretanha. Parièr amb lo domeni .eus pel Bascoat, .gal pel galèc... Totes eles an seguit la draia marcada en 2005 pels catalans amb lo .cat, qu’enregistra mai de 110 000 domenis sus Internet.
 
Es pr’amor d’aquò que, un còp oficialament espeçat lo mite que determinava un sol domeni per cada estat, e non pas un domeni per cada cultura, es ora que se passe quicòm en Occitània. Las experiéncias bretona, basca, galega e catalana indican fòrça plan lo camin de seguir, que se basa sus dos elements clau: un grop promotor seriós, discret e trabalhaire, amb lo sosten massís de la populacion afectada. Dins lo cas breton s’amassèt mai de 20 000 signaturas de sosten, del temps que los catalans en reünissián mai de 60 000. Al delà, dins los dos cases, las institucions regionalas e localas tanben s’i engatgèron, mas lateralament e sens cap d’intencion de politizar ni de dirigir res. Es important de metre en evidéncia que l’ICANN fugís la politica e se fonda, unicament, sus de critèris tecnics e de demanda. Dins aquel sens, l’importància de la Wikipèdia occitana es remarcabla e cal, pr’amor d’aquò, que se refortisca e que siá mai consultada.
 
En mai d’aquò, l’activitat occitana sus Internet es de mai en mai nombrosa e de qualitat. Lo Congrès Permanent per la Lenga Occitana ven de metre al ponch un sistèma de reconeissença vocala, ÒcTèle prepausa de programacion de qualitat, Gabrièu Pelisson es vengut un youtubaire de renom... aquel domeni poiriá tanplan beneficiar de l’Institut Occitan de Cultura, de l’Ofici Public de la Lenga Occitana, de Calandreta, de la FÈLCO, de l’IEO, de Tè Vé Òc, de fòrça publicacions, ràdios, etc.
 
Occitània es una nacion, de la meteissa manièra qu’o son Bretanha e los Païses Catalans. Occitània a de besonh per aquela rason d’un domeni pròpri. D’aver un domeni pròpri a un efièch multiplicador sus la cultura e sus la lenga, e al meteis moment legitima enòrmament la nacion als uèlhs de tot lo Mond. Dich d’un autre biais, s’Occitània a un domeni pròpri sus Internet, serà coma s’una esquipa de rugbi pogèsse de categoria, perque superarem l’esperit de resisténcia per adoptar un cèrt esperit d’ofensiva. Es arribada l’ora de quitar de servar los petits espacis d’occitanitat e de n’ocupar de nòus. E, dins aquela estrategia, Internet es pas solament la granda veirina mondiala e la carta de presentacion planetària, mas tanben es un endrech qu’escapa a las politicas culturicidas de l’estat francés. Lo camin es traçat: ara solament cal que los occitans ne sapiam tirar profièch.
 
La còla de Jornalet sostenèm l’inciativa. Anem per .occ!