La lista representativa del patrimòni cultural immaterial de l’umanitat es una mesura de l’UNÈSCO que dempuèi 2003 se bat per ajudar a salvagardar lo patrimòni oral e viu passat de generacion en generacion coma las tradicions oralas, los saber-far artisanals de transmetre, las lengas e las culturas en dangièr... Lo patrimòni immaterial es vist coma un depaus de la diversitat culturala e de l'expression creativa, amb la tòca de documentar, protegir, promòure e revitalizar las culturas vivas que son vulnerablas a las colonizacions, la mondializacion, la transformacion sociala e l’intolerància.
 
En Occitània son patrimòni immaterial de l’umanitat las ostensions lemosinas (2013), las fèstas del fuòc de Comenge e Aran (2015), la perfumariá a Grassa (2018). A mai, La Gàrdia a demandat son inscripcion per preservar l’occitan gardiòl. Tanben vòlon far partida de la lista los castèls de Montsegur, Puèglaurenç, Querbús, Pèirapertusa, Aguilar, las Tors e Tèrmes. De soslinhar que la Chambra d’Òc se bat dempuèi 2008 per que la lenga occitana aja aquela reconeissença.
 
Dimècres passat, 31 de març, se barravan las inscripcions de las nominacions pel periòde de 2022. França i presentèt sa candidatura: la bagueta, un biais de far de pan que creson qu’a un vertadièr besonh d’ajuda internacionala per èsser salvagardat. France 24 o publicava lo 26 de març. Sus Jornalet o publicàvem dijòus passat, 1r d’abril, per veire se los legeires o prenián coma un peis d’abril, car vertadièrament pareis qu’o siá. Totun, cresèm pas que la nominacion de la bagueta coma patrimòni immaterial de la umanitat siá una accion ninòia, mas puslèu nos sembla que s’inscriga dins las valors mai prigondas del jacobinisme que combat amb totas sas fòrças lo respècte cultural, la pluralitat lingüistica, la diversitat regionala e la riquesa patrimoniala.
 
Coma o avèm dich adès, la tòca de l’UNESCO es de salvagardar lo patrimòni oral e viu passat de generacion en generacion coma las tradicions oralas, los saber-far artisanals de transmetre, las lengas e las culturas en dangièr... Cresètz vertadièrament qu’en França çò qu’es mai urgent de salvagardar es la bagueta? «Qu'ils mangent de la brioche!».