Del temps que l’occitanisme manifestava a Montpelhièr, en octòbre de 2015, se debanava en Arle una contramanifestacion convocada pel Collectiu Provença (escrivon “Collectif Prouvènço”), que revendicava la non-occitanitat de la lenga provençala. Qualques milièrs de personas desfilèron al crit de “ni pacaians, ni occitans, provençaus!”. Dempuèi alavetz, los avèm pas vistes a manifestar contra la supression del provençal de l’educacion publica, ni per la Lei Molac. Tanpauc los avèm pas entenduts a reclamar la ratificacion de la Carta Europèa de las Lengas Regionalas o Minorizadas ni mai participar al collectiu Per que viscan nòstras lengas.
 
Lo Collectiu Provença presica un regionalisme francés conservator e folclorista que contraven pas brica a la concepcion jacobina del territòri. Aquel regionalisme folclorista es mes en plaça per mejan d’un poison antioccitanista que ten per tòca de combatre l’occitanisme de Robèrt Lafont, seguit timidament per l’activisme intellectual del país coma l’Institut d’Estudis Occitans, lo Felibritge, las calandretas, la FÈLCO, Niça Pantais, Parlarem, lo Forum d’Òc, l’Assemblada Occitana...
 
La tòca de l’antioccitanisme es pas solament de defendre l’statu quo jacobin en Provença, mas tanben la creacion d’un enemic exterior e, doncas, l’estrangierizacion de tot aquel provençalisme occitanista mençonat adès, que son sovent acusats d’èsser complices d’un pretendut imperialisme occitan que cercariá de tuar l’autenticitat provençala. L’istòria nos apren qu’aquela sòrta de discors paranoiac e messorguièr mena a l’intransigéncia e a l’òdi.
 
En 2016, raportàvem cossí lo govèrn regional d’Estrosi subvencionava lo Collectiu Provença per un projècte monumental e passadista d’observatòri de la lenga, del temps que redusiá a la mitat l’ajuda a las calandretas. Dins tot plen d’autras situacions, lo Collectiu Provença a fach pression per ensajar de barrar de corses d’occitan en pretendent que s’i ensenhava pas la lenga de la “region”. Al començament de julhet vos assabentàvem qu’aquel Collectiu Provença s’ocupariá de las cultura e lenga del país, en tot presidir la comission Patrimòni, tradicions e lengas regionalas.
 
Arriban de tempses de dificultat per l’occitanisme a l’èst del país. Los 25 212 ciutadans qu’an votat per la lista Òc per Provença a las regionalas devon desenant trobar la solidaritat dels autres occitans. Totes devèm refortir en Provença l’Institut d’Estudis Occitans, lo Felibritge, las calandretas, la FÈLCO, Niça Pantais, Parlarem, lo Forum d’Òc, l’Assemblada Occitana...