Fondat en sègle XIX en Salardú (Pujòlo), eth Refugi Ròsta siguec eth prumèr establiment ostalèr dera Val d’Aran. Restaurat e recuperat en 1979, ara cerque un nau proprietari. Manel Rocher e Àngels Ros, que l’an bailejat tot aguest temps, se retiren e cedissen er establiment; hèn çò que se’n ditz un “traspàs[1]“. Totun, eth Ròsta non ei un establiment coma es auti: “Mos agradarie qu’es naui proprietaris contunhèssen eth nòste trabalh e eth sentiment d’ospitalitat qu’avem dat ath refugi e dèssen continuament ath Pyrenmusèu e ara difusion deth pireneïsme”, ce mos condaue Manel era setmana passada. “Sabem que non ei sonque un desir e qu’era persona qu’investisque e prene açò serà liura de hèr çò que volerà”, en tot cas, ei ua bona oportunitat de negòci. D’ací a uns dies ne publicaram un petit reportatge en vidèo en Eth Ligam Occitan.
 
Manel e Àngels son apassionadi dera montanha e deth pireneïsme. En 1979, deishaven eth sòn engatjament en un refugi de montanha e, amassa damb Francesc Rocher, començaven ua naua aventura en país nòste en tot aquerir eth Ròsta. “Hérem un trabalh de restauracion e pendent toti aguesti ans auem aufrit un servici d’ostalaria e restauracion d’un punt d’enguarda fòrça personau en tot recuperar eth sentiment d’ospitalitat fòrça pròplèu dera persona, damb es clients, en tot aufrir minjar de qualitat e en tot cercar mès d’aver amics que non pas clients”.
 
En 2008 museïzèren tota era bastissa damb ua grana sala consagrada ath Pireneïsme qu’expòse ua colleccion de documents, imatges e objèctes des prumèrs pireneïstes coneishudi. Eth musèu se daurís damb eth lèma “Caminar, sénter e escríuer”; qu’ei coma Henri Beraldi definic eth concèpte de pireneïsme en 1897. “Es pireneïstes èren es que favoriren era neishença deth torisme en aqueres montanhes damb un esperit aventuraire, naturalista e umanista”, ce mos didie Manel.
 
En aguest sens, era còlha deth Ròsta an organizat enes darrèri ans eth hestivau Pyrenades en tot cercar de reïnterpretar eth legat des prumèrs pireneïstes. Eth hestivau a includit era Mòstra de Cinèma de Montanha a on se presentèc eth documentari Aguestes Montanhes, que tracte era istòria dera estacion d’esquí de Vaquèira, e qu’ei realizat per Ivó Vinuesa e eth madeish Manel Rocher.
 
Fin finau, volem arremercar que Manel e Àngels priorizen er occitan enes sues comunicacions, senhalizacions e escrits. Tanlèu qu’arribèren en Aran aprenéren a parlar er aranés, e l’estimen e l’empleguen ena vida vidanta. Mos agradarie fòrça qu’es naui proprietaris deth Ròsta respectèssen tot aqueth patrimòni, materiau e immateriau, era casa e era cultura deth país, er establiment e er acuelh de proximitat, er amor as montanhes e as montanhòs.

Tà mès informacion, podetz escríuer a refugirosta@gmail...



FM