Lo 18 de setembre passat, i aguèt una manifestacion nazi al centre de Madrid. Qualques centenats de manifestants, venguts de tot l’estat espanhòl se passegèron per las carrièras del quartièr de Chueca, epicentre del movement pels dreches del collectiu LGBT. Atal, amb lo braç alçat se cridava “Heil Hitler” e mai “gais, fòra de nòstres quartièrs” en emplegant lo mot pejoratiu espanhòl per sonar los gais, que de còps los nomenavan tanben “sidoses”. Tanben cridèron contra Greta Thunberg, que qualificavan de “mostre de la cara de mostre”, contra los migrants, los refugiats e qualques politicians d’esquèrra. La permissivitat de la polícia a provocat l’indignacion dins l’estat espanhòl, mai que mai après que la representanta del govèrn espanhòl a Madrid a justificat que la polícia dissolguèsse pas la manifestacion. “ La polícia servís per resòlver de problèmas, non pas per ne crear”, çò diguèt. E s’en luòc de nazis foguèsson de catalans que vòtan dins un referendum?
 
Fàcia a la polemica provocada, las autoritats espanhòlas ara vòlon adobar l’afar e lo ministèri public a dobèrt una enquista per delicte d’òdi. Per ara an decidit d’infligir una multa de 600 èuros als dos collectius qu’organizèron la manifestacion. De soslinhar que la lei espanhòla prevei d’emendas de fins a 30 000 èuros per aver ofensat Espanha, e qu’a 34 elegits e personalitats independentistas catalans lor an fach pagar una caucion de 5,42 milions d’èuros.
 
Los mèdias n’an pas gaire parlat, franc dels locals. Jornalet raportèt pas tanpauc l’afar, mas ne volèm parlar dins aqueste editorial pr’amor que cresèm qu’una manifestacion d’aquela mena es un problèma grèu non solament per l’estat espanhòl mas per tota l’Union Europèa. Nos esglàsia que las autoritats espanhòlas ajan autorizat e permés una manifestacion en favor d’una ideologia que presica l’extermini de las personas pel simple fach d’èsser josievas, esquerristas, ròms, migrants o omosexuals. Mas sustot nos esglàsia la permissivitat infinida de l’Union Europèa envèrs la barbariá de l’estat espanhòl.

 

This is a nazi march today in #Madrid, #Spain. Nazis gathered in historic gay area of #Chueca to shout “Get the f*agg*ts out of our neighborhoods”. A bigot reaction, recruiting young folks

If we don’t teach our kids tolerance, others will teach them hatepic.twitter.com/z7aoKh9ws9

— Everything for everyone (@evything4evyone) September 18, 2021

 

fffff		fffff
	P.S.: l’afar Puigdemont   Mentretant, dijòus, d’agents de la polícia italiana arrestavan Carles Puigdemont. En junh passat, lo Burèu de l’Avocat general de l’estat espanhòl diguèt a la Cort Generala de l’Union Europèa (CGUE) que lo mandat europèu d’arrèst contra el èra suspendut. Ara se ven de demostrar qu’èra faus. La CGUE ne demandèt la suspension mentre qu’estudiava cossí respondre a las questions del jutge espanhòl que perseguís Puigdemont. Dins los jorns avenidors aurem mai d’informacion sus aqueste afar, mas per ara sembla qu’es pas solament la justícia espanhòla qu’a perdut son prestigi e son crèdit, mas tanben l’executiu espanhòl. De veire se l’Union Europèa cluca totjorn los uèlhs.