Comença una nòva annada e coma d’abitud es ora d’exprimir los bons vòts per ongan. La còla de Jornalet esperam un bon an per Occitània. Volèm doncas qu’ongan se dobrisca mai de calandretas e de classas immersivas e bilinguas dins las escòlas publicas, qu’aumente la senhalizacion en occitan e que crescan los corses d’occitan per adultes. Volèm, en general, que i aja mai de volontat que jamai per recobrar e aimar l’occitan sus la draia que siá tornarmai la lenga d’usatge social, aqueste còp sens vergonha. Tanben desiram, de segur, que lo caumatge davale e qu’arribe lèu la fin de la pandemia, que las perspectivas economicas se melhoren  e que los occitans quitem de patir las consequéncias d’aquelas crisis. Totun, cal pas sonque esperar e desirar que 2022 siá melhor, fagam qu’o siá. Es entre nòstras mans. Es pas aisit, mas es possible.
 
Es pas aisit. Avèm vist cossí an tombat per tèrra la granda capitada de Paul Molac per la reconeissença de las lengas mespresadas. Mas Molac e la còla que se baton amb el son totjorn quilhats e obtenon de petitas victòrias. Avèm vist qu’après dos ans de pandemia, los govèrns europèus, luènh de destinar totas lors ressorsas a la santat, an despensat mai d’argent que jamai en defensa; fan mai d’esfòrces per reprimir la populacion que non pas per la sonhar. Avèm vist cossí l’estat francés es designat responsable mas “sens fauta” de la mòrt de Rémi Fraisse. Mas tanben avèm vist una vintena de victòrias dins l’encastre ecologista.
 
Dins aquestes darrièrs jorns de l’annada, avèm vist de causas polidas que nos encoratjan fòrça a seguir lo combat per la lenga. Avèm vist d’araneses, de mond de las Valadas e de roergasses a cantar ensems, avèm vist l’engatjament seriós per l’occitan del conselh departamental de Dordonha, avèm vist de projèctes coma Vikidia bastits per d’escolans occitanofòns de 8 a 13 ans, avèm vist cossí un videoclip de la Mal Coiffée rodat per Piget veniá viral, e quitament avèm descobèrt, estonats, una lista de mai de 1270 cançons en occitan sus Spotify. La darrièra d’aquelas reüssidas, que la volèm felicitar especialament, es lo vidèo que lo ven de publicar Gabrièu Pelisson sus son canal YouTube Parpalhon Blau. Pelisson a totjorn fach un trabalh de qualitat qu’a plan reüssit a far difusion de l’occitan sus la plataforma vidèo preferida dels joves. Ara, son darrièr trabalh es una òbra interoccitana de tria que nos rapròcha los unes dels autres, e nos permet de nos conéisser melhor per caminar ensems.