Cal obligar la populacion d’adoptar quicòm que nos fa ben? Es acceptable que s’impause la vaccinacion obligatòria fàcia a una situacion de pandemia?
 
Los vaccins son, en general, una reüssida de l’umanitat que cal saludar. An ben capitat a eradicar de malautiás coma la picòta del temps que nos prevenon de la pòlio, del sarrampiu o de la rubeòla. Ara, totun, a fàcia la covid-19 parlam de cèrts vaccins creats per divèrsas societats comercialas que s’impausan, s'administran o s'enebisson segon los interèsses comercials. Aital en Euròpa e als Estats Units son enebits los vaccins rus e chinés del temps qu’en Russia e China an enebit los vaccins occidentals. A mai, parlam de cèrts vaccins que se pretend que prevenon las infeccions mentre que las evitan pas, e aital nos prepausan de mai en mai de dòsis. Mentretant, de societats coma Pfizer an doblat lors revenguts gràcias al vaccin, çò publicàvem divendres dins las paginas de Jornalet.
 
E del temps que se fa de mai en mai de vaccins qu’eliminan pas la malautiá per nos protegir imperfièchament del virus, s’investís pas mai d’argent per nos protegir de çò que vertadièrament a tuat tant de mond dins aquesta pandemia: la manca d’unitats de suènhs intensius, l’escassetat de ressorsas medicalas e socialas, la restriccion de l’accès a la santat publica, l’isolament, l’aument dels suicidis...  Se tot lo profièch economic qu’an obtengut las societats farmaceuticas gràcias a la pandemia foguèsse destinat a melhorar tot aquò?
 
E ben, dos ans an passat e las infrastructuaras espitalièras son totjorn deficientas. Sembla que lor es mai productiu d’impausar de mesuras restrictivas e de contraròtle social.