Nos a tirat l’atencion lo fach que l’Institut Ramon Llull, integrat per la Generalitat de Catalonha, lo govèrn de las Illas Balearas e la comuna de Barcelona considère l’aranés coma un objècte de promocion e mai sa tòca siá la projeccion internacionala del catalan. Mas o fa, perque existís pas cap d’organisme semblable per l’occitan e perque l’occitan es lenga oficiala en Catalonha. Es verai qu’avèm pas l’equivalent occitan de l'Institut Ramon Llull catalan, de l’Institut Cultural Romanés, de l’Institut Cervantes espanhòl, de l'Institut Camões portugués, de la Societat Dante Alighieri italiana, del British Council britanic o de l’Institut Goethe alemand. Totes eles trabalhan per divulgar lors culturas respectivas dins lo Mond entièr. Nos fariá ben d’aver un Institut Frederic Mistral!
 
D’autre caire, nos a tirat l’atencion lo fach que l’Ofici Public de la Lenga Occitana (ÒPLO) ajude a crompar de libres en occitan als collegians e liceans de doas regions del país, mas pas a la rèsta.
 
Saludam, de segur, l’excellenta iniciativa de l’ÒPLO, que fa un obratge de tria amb los escolans; dins la situacion actuala que se tròba l’occitan, los escolans son lo sol espèr de subrevivéncia e reviscolament de la lenga nòstra. Pasmens, nos demandam s’un ofici public poiriá beneficiar als escolans dels autres territòris occitans. I a quicòm qu’o empedisca?
 
L’Institut Ramon Llull ajuda als escrivans valencians a lor promocion internacionala e mai l’administracion valenciana i siá pas d’a fons engatjada. L’ÒPLO, el, crompa pas de libres en catalan als escolans de Perpinhan ni mai en basco als escolans de Sant Joan de Lus. Se poiriá ajudar als escolans occitans d’Aran, Auvèrnhe, Niça, Provença o las Valadas?