La redaccion d’aqueste jornal trabalham totjorn amb de ressorsas plan limitadas. Internet fa venir possible que trabalhem ensems la redaccion a Barcelona, lo lingüista a Pèiralata, lo locutor a Peireguers e tota la còla de collaboradors escampilhats dels Alps als Pirenèus. Tanben o fan venir possible l’energia e lo vam que nos dona l’amor qu’avèm pel projècte. Malgrat nòstras limitacions, ensajam de prepausar cada jorn d’informacions que pòrten quicòm de nòu als legeires, siá un vejaire diferent de presentar una nòva, siá una informacion que los mèdias egemonics rapòrtan pas. En mai d’aquò, nos còsta de raportar de causas de mai verificar, mai que mai a una epòca ont las informacions falsas son fòrça presentas.
 
Un dels subjèctes que ne parlam plan pauc e que mai poiriá a l’ora d’ara interessar nòstres legeires es las eleccions legislativas. Ne voliam parlar, mas nos vesèm fòrça limitats per èsser a l’agach de tot. Pasmens, avèm agut l’astre de participar a un projècte lançat per Ràdio Lenga d’Òc de Montpelhièr amb la collaboracion de Ràdio País, Ràdio Occitània, Aquò d’Aquí e Jornalet. Es aital que comencèt dimècres passat una sèria de cinc emissions de mièja orada que prepausan un agach occitan sus las eleccions legislativas dins l’estat francés. Amassa abordam las generalitats politicas e los subjèctes de lenga, environament e mond del trabalh per Occitània. Son 5 emissions de mièja orada cada dimècres e se clavarà lo diluns 20 de junh, en seguida del segond torn.
 
Tot espaci lingüistic e cultural que vòl viure a de besonh de son espaci nacional de comunicacion. Occitània pòt pas èsser una excepcion, car un país sens sos mèdias a perdut son imaginari collectiu e sa vision del Mond, sequestras, perque recep e analisa las nòvas amb lo ponch de vista de qualqu’un mai. En mai d’aquò, los parlaires de la lenga, los que l’aprenon, los calandrons, los que l’aprenon dins l’escòla publica o dins d’autres encastres, e totas las personas que prèson la lenga del país, que la parlen o non, an drech d’aver de mèdias en occitan. Podèm dire —amb tota l’umilitat mas tanben sens complèxe— que los mèdias en occitan son de pèiras que fan partida del mur de sostenement contra la fin de nòstre pòble. Per aquela rason, saludam l’iniciativa de Ràdio Lenga d’Òc e mercejam tota la chorma qu’amassa podèm prepausar una informacion en occitan, a l’occitana e amb dignitat.
 
 
 

---

Escotatz la primièra emission