Gasconha es venguda un país en movement per la lenga occitana. L’edicion 2022 de “La Passem!”, una corsa de relèu per la transmission de la lenga, arriba uèi a Pau après aver percorregut 600 quilomètres en traversant lo Bas Ador, las Lanas, Bigòrra e Bearn en tot mobilizar la societat civila long de son passatge. La corsa partiguèt dijòus de Sent Martin de Senhans, après una seguida d'animacions organizadas pels escolans de la filièra bilingüa. Los organizaires de l'eveniment an encapat un afar primordial de la lucha occitanista, s’apropriar una revendicacion transversala, viva, joiosa e combativa.


Après una pausa deguda a la ndemia, aquesta segonda edicion de “La Passem!” a consolidat l’eveniment coma una corsa e a l’encòp una fèsta nacionala de revendicacion. S'agís d'una idèa brilhanta del collectiu Ligams, per revendicar la transmission de la lenga, e sustot, per semenar dins nòstras consciéncias que podèm pas permetre que desaparesca la riquesa pus preciosa qu'ajam, qu'es la que fa de nosautres de ciutadans del Mond en occitan e a la faiçon occitana, e aital escambiam amb la rèsta de l'umanitat nòstre biais d'èsser, de pensar, de parlar e de viure.
 
Amb aqueste editorial, la còla de Jornalet volèm benastrugar los organizaires e los participants de l’eveniment al qual esperam d’ajudar dins las edicions venentas. En mai d’aquò, volèm incitar la rèsta del país a organizar d'eveniments similars, tanben d'un biais transversal, joiós e viu, e tostemps revendicatiu.

 
 

 


Podètz seguir tota la corsa sus Ràdio País.