Amb l’Universitat Occitana d’Estiu (UOE) es partit un estiu tot plen d’eveniments per far viure la lenga. Dempuèi divendres passat a Nimes se parla mai que mai de las urgéncias climatica e lingüistica que, segon qualques sabents, son de subjèctes associats. Lo programa d’ongan es de tria, Ràdio Lenga d’Òc a un platèl sus plaça e Tè Vé Òc tanben raportarà l’eveniment.
 
Tanlèu finida l’UOE de Nimes, començarà l’Universitat Occitana d’Estiu de la Guépia, al Segalar Roergàs, del 13 al 16 de julhet. L’eveniment es organizat pel collectiu Lenga Viva e prepausa d’aprigondir mai nòstra cultura dins de jornadas ont se cantarà, dançarà e se viurà amassa en occitan.
 
E la cerièra sus la còca la pausarà, de segur, l’Escòla Occitana d’Estiu (EOE) a Vilanuèva d’Òlt (Naut Agenés) del 14 al 20 d’agost. Aquesta 48a edicion arriba amb mai de vam que jamai e una còla de tria. L’EOE prepausa una setmana d’immersion dins la lenga occitana, de corses d’occitan en totes los dialèctes, d’obradors, d’animacions, de danças, de velhadas tradicionalas, de concèrts, de balètis… e los mai petits fan lors activitats en occitan dins l’Escoleta. Cal dire que l’EOE es mai que mai un bastion de normalitat e mai de libertat. L’EOE es un endrech ont maites occitans podèm viure ensems pendent una setmana en occitan e a la faiçon occitana.
 
Que l’usatge social de l’occitan aja desaparegut per tot lo país franc d’Aran es una realitat. Totun, la creacion culturala en occitan es totjorn impressionanta. A mai, los ensenhaires, tant del public coma de Calandreta, fan de vertadièras proesas per que se contunhe l’ensenhament de la lenga o en la lenga. S’a tot aquò apondèm aqueles petits bastions de normalitat que se multiplican dins l’estiu, avèm las pèças clau que nos cal per bastir un país que vòl viure dins una lenga vièlha que se vòl pas calar.