Los mèdias numerics se pòdon devesir en dos grops: los gratuits e los pagants que normalament an, pasmens, una petita part dobèrta. Lo cas de Jornalet, coma sabètz plan, es absoludament gratuit e consultable liurament dempuèi quin endrech que siá de la planeta. Cresèm qu’a l’ora d’ara es fòrça important de difondre la lenga sens cap de restriccion e de la far venir una aisina veïculara per las informacions e las opinions. Jornalet festejarà lèu un an de vida e podèm dire, amb tota l’umilitat, qu’avèm plan capitat aquela tòca.
 
Ça que la, totes sabèm que la presenta situacion de crisi economica a provocat una reduccion de las partidas economicas que las entrepresas privadas destinan a la publicitat e una davalada de las subvencions publicas. Jornalet, en consequéncia, n’a patit los efièches e las intradas son demesidas. Mas cal pas aver paur perque lo vòstre jornal occitan de referéncia serà pas pagant. La manca de ressorsas economicas es remplaçada per l’entosiasme e l’esfòrç de la còla de Jornalet e de totas aquelas personas d’Occitània tota que nos ajudan d’un biais absoludament desinteressat, e mai se fòrça d’entre nosautres investissèm fòrça oras cada setmana per far possible lo jornal numeric que sètz a legir.
 
Ça que la, coma auretz vist darrièrament, avèm publicat una petita bandièra ont demandam, a qui pòsca e vòlga, una petita quantitat volontària per ajudar aqueste projècte. Avèm ja recebut qualques dons, que mercejam fòrça, mas cresèm que cal oficializar aquesta crida dins un editorial per la far mai solemna. La question es simpla: quantes sòus pagariás cada an per legir cada jorn lo Jornalet? Quantes sòus pagas ja cada an per legir un jornal en francés? Alavetz, se pòdes far un petit esfòrç e nos ajudar cada an amb la mitat de la mitat de la chifra qu’ès a pensar, la còla de Jornalet te mercejarem plan e ajudaràs a consolidar un jornal en lenga d’òc, qu’es ja quicòm. Ès a qualques “clics” d’o far possible. Mercés a totes.