Lo Conselh General d’Aran publicava dimècres passat son inquietud fàcia a la situacion critica de l’aranés, mai que mai demest los joves. Un sondatge fach a 126 escolans de segondària mostrava que solament lo 2% dels joves araneses emplegan la lenga suls rets socials e que mai del 18% parlan la lenga en familha mentre que lo 68% la mestrejan.
 
Fàcia a aquela inquietud, lo govèrn aranés a organizat doas sessions de conscientizacion lingüistica a l’escòla segondària del país per cambiar las actituds lingüisticas dels joves. Un dels subjèctes prepausats es perqué los joves araneses emplegan pas l’aranés suls rets socials; aquò los fariá unics e diferents fàcia una majoritat que concor en escrivent en una de las lengas egemonicas. L’exemple mai clar l’avèm amb l’òbra magnifica del niçard Gabrièu Pelisson qu’a capitat d’èsser una figura pro coneguda amb gaireben 6000 seguidors sus YouTube e mai d’un milièr sus Instagram.
 
D’autre caire, l’Euroregion Pirenèus Mediterranèa —a l’iniciativa de la region qu’a pres lo nom d’Occitània— a lançat un concors adreiçat als joves qu’incitan a l’usatge de l’occitan e del catalan suls rets socials; los ganhaires recebràn de prèmis de 400 a 1200 èuros.
 
De viure plenament en occitan en Occitània es, uèi per uèi, practicament impossible. La causa n’es pas la manca de ressorsas culturalas, literàrias o jornalisticas. Sembla que siá pas tanben una question de reconeissença legala, a ne jutjar pel cas d’Aran. La manca de locutors, d’un latz, e la desconeissença de l’ensemble de l’occitanitat, de l’autre, es çò que nos dona als occitanofòns la sensacion d’èsser isolats e, de còps, de presar pas la lenga nòstra. L’usatge intensiu dels rets socials es una aisina indispensabla per recuperar l’usatge social de la lenga e qu’o fagan los joves es mai que mai indispensable per far de l’occitan una lenga viva.
 
Saludam l’iniciativa del Conselh General d’Aran de conscientizar los escolans a la situacion de la lenga. Saludam l’iniciativa de l’Euroregion de guierdonar l’usatge de l’occitan suls rets socials. Ara seriá ça que la desirable que las doas institucions jonguèsson lors esfòrces per aténher aquela tòca. Una man lava l’autra, e totas doas la cara.

 

Es enquèstes lingüistiques realizades ar escolanat der Institut d’Aran revèlen era critica situacion der aranés.

Mès informacion: https://t.co/m1rtiGFaJZpic.twitter.com/ETYfxL4wSL

— Conselh Generau d'Aran (@conselharan) October 19, 2022

 

Parles #occitan o #catalan enes hilat sociaus? Era @Euroregion te prèmie

E brembatz qu'er aranés, tanben ei occitanhttps://t.co/ZwO7EXZfWhpic.twitter.com/LbRtHD8G1x

— Occitan aranés (@occitan_aranes) October 20, 2022