Comença una nòva annada e coma d’abitud es ora d’exprimir los bons vòts per l’an 2023. La còla de Jornalet esperam que serà un bon an per Occitània. Volèm que se dobrisca mai de calandretas e mai de classas bilinguas dins las escòlas publicas, que l’aranés siá tostemps veïcular dins l’ensenhament en Aran e que l’usatge social de la lenga aumente de las Valadas fins a Medoc e de Borbonés a la Gàrdia. Esperam que creisserà la senhalizacion en occitan e qu’aumentaràn los corses d’occitan per adultes. Desiram que lo caumatge davale, que las perspectivas economicas se melhoren e que l'ÒPLO aja mai de ressorsas e s’espandisca a totas las regions occitanas. E sustot desiram que l’occitanisme venga un movement politic e cultural fòrt, coesionat, transversal e unit.
 
Per quant a França e son govèrn, n’esperam puslèu paucas causas, mas cresèm d’aver rason d'exigir que se càmbie l’article 2 de la Constitucion e que, per tant, la Cort Constitucionala aja pas pus cap de rason de censurar la Lei Molac. Volèm tanplan que lo govèrn ratifique la Carta Europèa de las Lengas Regionalas e Minoritàrias e que rectifique sas politicas lingüicidas e culturicidas per reparar lo mal fach. Tanben volèm que quite de vendre d’armas, mai que mai a l’Arabia Saudita que son conflicte amb Iemèn es qualificat per l’ÒNU de “pièger crisi umanitària de nòstre temps”.
 
E nos cal reconéisser qu’esperam sustot de veire coma Aran, un país occitan, vendrà enfin lo far d’una Occitània mens alienada e mai liura e sobeirana. Demandam al govèrn aranés que vire pas l’esquina a la rèsta del país occitan e que permeta que lo pòble aranés aja l’accès complet a tota sa lenga e cultura, mai que mai aqueste an 2023 que commemorarem los cent ans de la naissença de Robèrt Lafont, una de las figuras pus grandas de l’occitanisme que degun n’a pas presa encara la relèva. De seguir las eleccions al Conselh General d’Aran que se tendràn lo mes de mai.