Un còp arrestada la transmission intergeneracionala de la lenga d’un biais normal, s’es tanben arrestada la transmission de la Vergonha. Aquò permet al mond que se pausen de questions, que sàpian cantar en una lenga que sabon pas parlar e que se serviscan d’aquela lenga per far las bandeiròlas dels suportaires dels grands espòrts, per sonar d’associacions alternativas e que se meta en valor aquelas lenga e cultura que nos las an raubadas. Avèm qualques unes dels elements necessaris per un reviscolament lingüstic. En mai d’aquò, sèm la lenga romanica minorizada melhor documentada durant los sègles e avèm una creacion culturala totjorn estrambordanta.
 
Demest la còla de creators del país trobam lo realizaire-productor audiovisual Amic Bedel, que nos acostuma a la granda qualitat de sos produches, totjorn innovants e originals: la realizacion vidèo de festenals, lo laboratòri Dètz TV, las produccions de Piget dont de collectatges, de reportatges, de documentaris, de videoclips... Ara, amb La Seria nos a pas brica decebuts mas al contrari nos ven de presentar una seria de television que rebat, amb umor, la realitat de l’occitan al país: i trobam una familha occitanofòna que mestreja la lenga mas que se’n chauta, una gojata del país qu’a pas jamai ausit un mot d’occitan e que pren los occitanofòns per de portugueses, un occitanista afogat qu’a d’idèas tant ambiciosas coma fòlas, lo pragmatisme de Catalonha ont los sòmis dels occitans son pas que d’illusions. Tot es aquò, combinat amb una tièra de personatges que poirián semblar caricaturals mas que rebaton plan la realitat del país e que nos parlan occitan en diferents accents, e tanben francés, catalan...
 
La Seria va delà lo regionalisme que mesprèsa las minoritats, mòstra aquela realitat del país, sovent invisibla pels quites abitants, e fa prene consciéncia per metre en valor tota aquela fragila cultura nòstra.
 
La Seria se presenta en 5 episòdis de 40 minutas e se pòt agachar sul sit de France TV. De non mancar pas!