Aquesta setmana avèm sauput que Nimes poiriá aculhir un colossal centre ludic a l’imitacion de Las Vegas. La tòca, que compta amb l’aprobacion de la Cambra de Comèrci e Indústria (CCI) d’aquela vila occitana, es d’aprofechar lo bon clima del país per i bastir un complèxe basat sul léser, la restauracion, lo jòc e las escomesas. Las chifras son astronomicas: mai de 700 ectars de complèxe per aculhir qualques 30 milions de toristas cada an que seràn lotjats dins las 30 ostalariás previstas dins l’encencha. L’investiment es tanben cosmic: aperaquí 16 miliards d’èuros.
 
Los promotors ja an anonciat que lo projècte crearà fòrça emplecs dins una zòna ont la taxa de caumatge es fòrça nauta. Es una bona esca dins una zòna ont la manca de perspectivas economicas es cronica e ont l’emigracion es una constanta dempuèi fòrça temps. Ça que la, aquò nos pòt pas far pèrdre de vista qu’aquel projècte nos pòrta mai de questions que de solucions. Per començar, aquò d’aquí es lo modèl de negòci que fa besonh a Occitània? Un enòrme centre de jòc e escomesas pòrta pas cap de valor aponduda al país, tot al contrari, pòt provocar una longa tipologia de problèmas pr’amor de la clientèla e los professionals que se senton atraches per aquela sòrta de centres. Al delà, los promotors del centre vòlon de modificacions legalas perque la lei francesa actuala lor permet pas de far çò que i vòlon far.
 
En mai d’aquò, segur, i a la question culturala. Los promotors e la CCI de Nimes an soslinhat que lo complèxe auriá un accent “made in France” ben marcat. E perqué pas “made in Occitània”? Un centre coma aquel pòt èsser lo còp de guilhotina definitiu contra la lenga e la cultura occitanas dins aquesta part del país nòstre. Quantes dels 30 milions de toristas previstes auràn contacte amb l’occitanitat? Pas cap, perque deu pas èsser previst. Per astre, lo centre de jòc de Nimes nos remembra d’autres projèctes faraonics que s’es volgut far recentament dins d’autres païses europèus e que, a l’ora d’ara, son pas anats delà la taula dels projèctes.