Coma ja sabètz vosautres, la majoritat de l’Assemblada de Corsega aprovèt que la lenga còrsa foguèsse cooficiala dins l’illa. Foguèt pas un vòte ajustat: totes los deputats presents i votèron favorablament. En total, 36 representants còrses votèron la proposicion, mentre que 15 s’exprimiguèron pas en cap de sens. La causa, vista per un marcian, fariá rire: la majoritat dels deputats còrses demandan que la lenga còrsa aja reng oficial en Corsega. “Es possible qu’o siá pas encara?”, çò se demandariá lo marcian. “Perque Corsega fa partida de França”, li respondriam en tot arrucar las espatlas.
 
La decision democratica per far venir lo còrs lenga oficiala deu èsser validada a París. Lo ministre de l’Interior, lo “catalan” Manuel Valls, a pas perdut temps per refusar l’idèa en la qualificar d’“inconcebabla”. Aquò es, doncas, lo biais de far e lo respècte democratic, segon lo socialisme francés e la govèrna de François Hollande, que podèm ja dire, sens paur de nos enganar, que mentiguèt al pòble quand prometèt que França ratificariá la Carta Europèa de las Lengas Regionalas e Minoritàrias. Davant aquel fach, un ciutadan còrs se poiriá demandar, legitimament, se la democracia, lo respècte de la legalitat republicana e las institucions de l’illa an qualque sens.
 
D’efièch, lo bastiment de la Republica Francesa s’es dreiçat sus la negacion e la liquidacion de totas las culturas e lengas qu’aguèron lo malaür de se trobar dins l’Exagòn e sos territòris d’otramar. Còrses, canacs, martiniqueses e occitans, nos a calgut renonciar a nòstra nacion e lenga en benefici de la lenga e la cultura francesas. Nos demandèron la permision? Segur que non. França, que se vanta mondialament d’èsser lo brèç dels Dreches Umans, es pas autra causa qu’un Estat culturicida e opressor. Nosautres o sabèm ja. Eles o sabon tanben. Sonque manca d’o explicar al Mond per que França pèrda sa masca.