Los legeires d’aqueste jornal sabon ben qu’avèm pas cap de problèma per parlar de Jornalet, mas qu’o fasèm solament de temps en temps. Es arribat ara un d’aqueles moments, pr’amor qu’un opinant e qualques legeires an dobèrt un tèma interessant: Fa qualques setmanas Eric Roulet denoncièt l’actitud del cònsol d’Auròs e son oposicion a dobrir una classa bilingüa malgrat qu’existisca una demanda importanta dins aquel sens. En seguida de l’article e del sieu succès, Roulet demandèt als legeires de mandar d’e-mails de protèsta al cònsol, çò que fòrça d’entre vosautres avètz fach amb tant de vam que sembla que lo cònsol aja permés la dobertura de la classa bilingüa per la sason que ven. Assistissèm, doncas, a una capitada que demòstra que l’informacion, acompanhada de l’accion ciutadana, capita ben gaireben totjorn, e doncas cal felicitar coralament Eric Roulet per son accion.
 
Qualques legeires, fòrça aimablament, an suggerit a Jornalet que siam mai actius per denonciar de cases semblables e qu’adoptem una actitud mai militanta. Malgrat qu’aquelas demandas nos fagan gaug, cresèm qu’aquel trabalh correspond pas a la premsa, mas a la societat civila e a l’occitanisme politic. De fach, es aital que s’es passat: la societat civila s’es mobilizada a l’entorn d’un cas concret, e Jornalet a fach solament çò que deu far un jornal centrat en un país: ne far resson e difusion. Cal prene en compte qu’un jornal francés, quin que siá, escrich e pensat en francés, auriá pas jamai fach resson d’un cas coma aquel, e la denóncia d’Eric Roulet seriá pas jamai arribada a un public receptiu, çò qu’auriá fach ganhar l’actitud del cònsol d’Auròs, e las familhas que vòlon una classa bilingüa aurián pas res.
 
Ça que la, al fons parlam de matises. Dobrir e manténer un jornal digital en occitan, mes a jorn cada jorn de l’an, es ja, per malastre, una aventura militanta. Se volguèssem ganhar d’argent e viure mai tranquils o fariam en francés. Mas justament perque volèm far un jornal normal per un país normal en una lenga normala, sèm convencuts que podèm pas trespassar una linha roja perque vendriam un instrument politic o activista, e aquò prejudicariá, al fons, la meteissa causa e la meteissa tòca que totes partejam.