Coma totes sabèm ben, i a agut d’inondacions grèvas en los Pirenèus occitans, e mai que mai son estadas terriblas en Gasconha. De pluèjas fòrça intensas e pas brica abitualas dins aqueste periòde de l’an, apondudas al desgèl de la granda quantitat de nèu qu’encara demorava sus las montanhas, qu’es pas tanpauc abituala dins aquesta sason, an configurat un scenari catastrofic. Davant una catastròfa naturala, totas las previsions son totjorn paucas, mai que mai quand aquela catastròfa es protagonizada per l’aiga, perque se sap que la fòrça de l’aiga pòt èsser devastaira quitament se se bastís d’obstacles e de canalizacions.
 
Lo cas es que dins l’estat francés i a agut qualques personas mòrtas, del temps que dins la Val d’Aran, ont l’aiga davalava amb una fòrça terribla, a pas calgut plànher cap de malastre personal. Dins aquel sens, es fòrça probable que la capacitat de reaccion sul terren de part d’una autoritat competenta e executiva, coma es lo cas aranés, siá estada determinanta per salvar las vidas e s’organizar dins lo caos. Per contra, una estructura burocratica, centralizada e verticala, amb una escassa capacitat de reaccion e decision al nivèl local, a favorit la manca de responsa e las desgràcias personalas. Es dur d’o dire aital, mas sarrar del territòri la capacitat de responsa executiva es mai eficient e democratic.
 
E mai n’avèm una autra pròva. Lo govèrn autonòm d’Aran aviá reclamat fòrça còps de poder netejar los lièches del riu de Garona e far qualques canalizacions preventivas. Mas, absurdament, la competéncia sul tèma èra a Saragossa, perque Espanha ten encara d’estructuras obsolètas del sègle XIX. Es incresable que l’autoritat competenta sus Garona siá la Confederacion Idrografica d’Èbre (CHE), mas es aital a l’ora d’ara. Benlèu aquelas inondacions serviràn a cambiar las causas e a las far evolucionar.