La decision del ministre de l'interior francés, Gérald Darmanin, de desplegar de fòrças de seguretat dins l'illa de Maiòta per combatre “l'immigracion irregulara” es una mòstra de mai de la politica d'immigracion restrictiva que la mena a tèrme lo govèrn francés.

Maiòta es una de las Comòras, situada dins l'ocean Indian. Venguèt francesa fòrça ans abans la rèsta de las illas de l’archipèla (Nzwani, Mwali e la Granda Comòra). Al referendum d’independéncia de 1974, foguèt la sola que causiguèt de contunhar jos la dominacion francesa. Totun, las Comòras ne reclaman la sobeiranetat. Una resolucion del Conselh de Seguretat de las Nacions Unidas de 1976 sostenguèt aquela reclamacion per una majoritat d’11 sus 15 membres; ça que la, França i depausèt son vèto e la resolucion s'aprovèt pas. En consequéncia, los abitants de l'illa son totjorn de ciutadans franceses, malgrat qu'una granda quantitat de comorians de las autras illas i arriben periodicament per fin de cercar de trabalh e de melhoras condicions de vida. Son los que l’estat considèra  coma “d'immigrants illegals”.

La responsa del ministre de l'interior francés, Gérald Darmanin, a aquela situacion es estada la repression. Aquesta setmana, a començat l’operacion Wuambushu (en maorés “represa”) mesa en òbra pel ministre. Aquela vasta operacion militara e policièra a per tòca d’expulsar los “estrangièrs en situacion irregulara”, de destruire los barracaments e de “luchar contra la criminalitat” sus l’illa. Dimars, un tribunal administratiu faguèt arrestar la destruccion del quartièr Talus 2, mas Darmanin quita pas de dire que l’operacion a d’èsser mantenguda, malgrat la decision de la justícia. Coma o raportàvem dimècres, pendent l’operacion la polícia e l’armada lancèron 650 granadas lacrimogènas, 85 granadas de desencerclament, 60 tirs d’LBD e 12 de balas realas.

Aquela politica repressiva es pas solament crudèla, mas tanben contraprodusenta. Los immigrants que son expulsats de l'illa i tornan lèu, pr’amor qu’an pas cap d’autra causida. A mai, la repression a per solet resultat d'aumentar la tension e la violéncia dins l'illa.

La politica d'immigracion restrictiva de França es pas solament desumanizanta, mas es tanben ineficaça. Lo govèrn francés deuriá cercar de solucions mai umanas per gerir la situacion. En luòc de se centrar sus la repression, lo govèrn deuriá cercar de biaisses de crear d'oportunitats economicas, valent a dire d’investiments suls sectors clau coma la santat, l'educacion e las infrastructuras. Es pas lo moment de destruire los barracaments mas de construire d’abitacions dignas.

L’actitud de Darmanin l’a joncha l’esquèrra melenchonista: lo pòrtavotz de La França Insomesa de Maiòta, Mikidadi Abdullah, a refusat de criticar l’ofensiva e a cridat a barrar las frontièras.

Çò de mai  semblable a un jacobin de drecha es un jacobin d’esquèrra.