L’estiu e las vacanças son per se pausar, s'espaçar, se distraire, escapar a las preocupacions del trabalh e gaudir del léser. La redaccion de Jornalet contunharà son trabalh mas un pauc mai pausadament: nos pausarem, mas sens que se pause lo fach de far viure l’occitan cada jorn. Per aquesta rason, volèm tornar prepausar quicòm qu’aviam ja dich qualques còps: far de torisme en Occitània.

E mai los viatges alonhats nos permetan de conéisser de nòvas culturas, lo torisme de proximitat pot ajudar a refortir la nòstra, que n’a de besonh. A mai, de conéisser plan un país tan grand coma Occitània se pòt solament far amb de temps, e las vacanças d’estiu son una bona escasença per o far. De vesitar la Val d’Aran, de s’espaçar en Peiregòrd, de virar pels Causses, de bronzar sus la còsta de Provença, de se passejar per las Valadas, d’agachar los volcans d’Auvèrnhe o de percórrer las Lanas son d’experiéncias pròchas que valorizam pas totjorn pro. Avèm pas besonh de tròp de jorns ni d’efectuar de grands desplaçaments, mas se cada estiu consagram qualques jorns a conéisser lo país nòstre descobrirem qu’Occitània es un país absoludament complet.

En mai d’aquò, de conéisser plan nòstre país es un acte de patriotisme occitan que deuriá èsser un fach normal. L’alienacion nacionala de nòstre pòble s’exprimís, coma o avèm sovent dich, a travèrs de la desconeissença del país, çò que nos mena a nos devesir e a assumir de referents exteriors a nòstra realitat. Dins aquel sens caldriá que los diferents responsables toristics regionals, los de las Valadas e de Torisme Val d’Aran pachèsson una estrategia promocionala conjoncha. L’union fa la fòrça, e un labèl “Torisme Occitan” provocariá, per se meteis, un cambiament de mentalitats.