Comença una nòva annada e coma d’abitud es ora d’exprimir los bons vòts per l’an 2024. Coma cada an, la còla de Jornalet esperam que l’an qu’arriba serà melhor per Occitània. Volèm que se dobrisca mai de calandretas e mai de classas bilinguas e de corses d’occitan dins las escòlas publicas, que l’aranés ganhe mai de vam en Aran e que l’usatge social de la lenga aumente de las Valadas fins a Medoc e de Borbonés a la Gàrdia. Esperam que creisserà la senhalizacion en occitan e que se desvoloparàn los corses d’occitan per adultes. Desiram que lo caumatge davale, que las perspectivas economicas se melhoren e que l'ÒPLO aja mai de ressorsas e s’espandisca a totas las regions occitanas. E per que tot aquò arribe, cal pas cambiar l’an. Çò que cal cambiar es un fum de causas dont tanplan l’occitanisme. Es per aquela rason que nòstre vòt principal per 2024 es que l’occitanisme venga un movement politic e cultural fòrt, coesionat, transversal e unit.

Per quant a cadun de nosautres, podèm començar de prepausar quicòm per començar l’annada amb d’actituds de combat simpaticas per viure al país e per far viure l’occitan.

Aital, podèm crompar de produches de proximitat e d’ajudar los productors locals, podèm installar l’occitan dins totes los logicials qu’o permetràn[1], podèm quitament prene l’abitud de demandar se i a una version en occitan de tot document que nos caldrà signar; e mai se dins lo 99% dels cases nos diràn de “non”, aurem almens dich que l’auriam preferit en la lenga del país. Mai complicat es d’entamenar las convèrsas en occitan, mas se prenèm l’abitud de saludar en occitan una persona al moment de la conéisser, li donarem lo benefici del dobte, e benlèu li donarem quicòm mai.

Mentretant, un grand ponch d'amassada de la comunautat occitanofòna es l'encastre numeric. Remarcam amb grand plaser que l’occitan conquista de mai en en mai d’espaci dins aquel còsmos infinit que nos es estat dobèrt. Delà l’activitat suls rets socials e quitament dins aqueste quotidian, i a d’iniciativas que cal saludar amb una brava capelada coma es lo cas d’Òc Tèle e totes los mèdias de ràdio e de premsa en occitan sus la tela, de jòcs vidèo coma Minecraft o Dordonha, lo grand Parpalhon Blau, lo Montametas, Biais de Dire, Vida d’Ors, Occitan words, Dètz Ambras, País Invisible, las aventuras de Delfina... e tantes autres. Enfin, desmembrem pas que gràcias al Congrès Permanent de la Lenga Occitana avèm en linha de diccionaris, de conjugadors, de traductors, de sintetizadors de votz e tota la tièra d’espleches que cal per far viure la lenga amb dignitat.

Bona annada!