Arriba l’estiu e los plans per las vacanças e pels pichons o grands viatges. Vesitar d'autres païses e d'autras culturas es un plaser dels mai grands qu'òm pòt far, en s'emportant de remembres e d'aprendissatges que demoraràn tota la vida. Viatjar luènh de l'ostal permet tanplan sovent una mesa en valor encara mai granda del sieu pròpri país, perque quand sèm luènh de l'ostal avèm totjorn un pauc de nostalgia del nòstre pichon país e, quand intram, nos avisam que los pichons chepics e problèmas de l'ostal, que de còps tant nos encanhan, pòdon èsser relativizats davant los grands problèmas d’aqueste mond. 

 

Ça que la, quitament s'aqueste estiu anam luenh, seriá bon de consagrar tanben qualques jorns al torisme interior occitan. Cal pas pas passar totas las vacanças en Occitània mas seriá bon d’ensajar d'i consagrar qualques jorns, quitament un parelh. Occitània es un país plan grand, talament grand que segurament fòrça occitans desconeissèm encara de grandas zònas del país. Coneissètz la còsta atlantica de las Lanas? E las montanhas abruptas de las Cevenas? E los Causses? Vos sètz passejats per lo Camin dels Angleses de Niça? Coneissètz l’encant medieval del País de Fois? E la gastronomia de Perigòrd? Coneissètz l'incresabla istòria de la Val d’Aran? Perqué pas far una escapada a l’Estivada de Rodés, que se debanarà entre lo 25 e lo 29 de julhet? 

 

Tot aquò son d'escapadas a la disposicion de totes que permeton de metre en valor un torisme intèrne que, dins lo cas occitan, a un fòrt compausant cultural, natural e gastronomic. Per astre, Occitània patís pas generalament un torisme massís que fa que lo país venga un endrech comol de toristalha. Aprofechem-o! Descobrirem un país, lo nòstre, d’una enòrma diversitat, tanben lingüistica, mas estrechament jonch dins la siá singularitat.