Las protèstas dels agricultors an capitat a paralisar tot l’estat francés, an blocadas las principalas autoestradas e son quitament arribadas de barrar d’accèsses a París. Aquelas protèstas comencèron en Occitània e Catalonha del Nòrd, se son estendèron dins tot l’estat e endacòm mai, dont Alemanha, Grècia, Polonha, los Païses Basses e Lituània. L’indignacion dels païsans es provocada per lor precarietat e l’aument de las taxas. Las causas del malèsser son de bon comprene: eles, que trabalhan la tèrra e noirisson lo país, son lasses de l’excessiva burocracia e de l’imposicion de nòrmas que los protegisson pas. En consequéncia, lor protèsta es sostenguda majoritàriament pels ciutadans, çò rapòrta Le Figaro. La còla de Jornalet comprenèm plan lors chepics e sostenèm plan lors revendicacions. A mai, metèm nòstras paginas a la disposicion dels païsans en lucha que voldrián raportar e comunicar lor combat en lenga occitana.

Aquò dich, volèm tanplan saludar una analisi de Reporterre, que mòstra cossí s’es volgut instrumentalizar aquelas protèstas per tresmudar l’ecologia en boc emissari de la colèra agricòla. Aquel article demòstra que lo vertadièr problèma es pas tant la transicion ecologica coma la manca de rendements. Se compren plan que la frustracion dels païsans arribe après l’acumulacion de nòrmas sens proteccion adeqüata pels agricultors. A mai, aquela sensacion es intensificada pel refús del finançament de l’agroecologia e l'escàs sosten economic del govèrn per l'agricultura ecologica. De fach, totòm reconeis lo malèsser social e economic, mas los agricultors en general e los ecologistas n’interprètan las causas de manièra diferenta: aquestes denóncian las politicas dels govèrns del temps qu’aqueles veson dins l’ecologia un boc expiatòri perfièch.

Davant aquela situacion, es crucial de cercar d'alternativas que reconcílien lo benèsser social e los besonhs ecologics. La Confederacion Païsana desira que s’enebisca la venda dels produches agricòlas jos lor prètz de còst. Lo sindicat apara mai de regulacion e una melhora remuneracion, dont un salari minimal garentit. Aquelas mesuras, defendudas tanben pels partits de l'esquèrra ecologista, poirián liberar los agricultors de la pression de las politicas neoliberalas e dels acòrdis de liure comèrci que pòrtan tòrt a lors revenguts. “L'esquèrra deu èsser al costat dels agricultors, fàcia a l'Euròpa neoliberala, a la Macronia e a las indústrias agroalimentàrias” çò soslinha la deputada “insomesa” Aurélie Trouvé, agronòma de formacion, que fa lo parallèl amb los Gilets jaunes. “Tot aquò es compatible amb nòstras revendicacions ecologicas”, çò precisa.

Le cadavre d’un sanglier pendu à un arbre dvt les bureaux de l’inspection du Travail d’Agen, symbole de l’asphyxie administrative des agriculteurs. Pneus, fumier et paille ont été déversés par les militants de la coordination rurale #agen#AgriculteursEnColere#OnMarcheSurLaTetepic.twitter.com/avxnlXWyvE

— Emmanuelle Souffi (@emmasouffi) January 25, 2024

 

#revenupaysan : les annonces de @GabrielAttal ne donnent aucune réponse pour le revenu ni pour protéger le travail des paysannes et paysans. C'est pourquoi la @ConfPaysanne poursuit ses mobilisations. pic.twitter.com/mi8MlVPaMt

— Conf' Paysanne (@ConfPaysanne) January 26, 2024