Gasconha es totjorn un país en movement per la lenga occitana. L’edicion 2024 de La Passem, una corsa de relèu per la transmission de la lenga, partiguèt dimars passat, 30 d’abril, de Tarba, e arriba uèi, 5 de mai, al Mont de Marsan après aver percorregut nuèch e jorn un trajècte de 1100 Km. qu’a traversat Bigòrra, Comenge, Armanhac, Bearn e las Lanas. Los correires qu’an portat lo ligam d’un luòc a l’autre an rescontrat d’animacions pertot en tot capitar de far un eveniment epic, transversal, viu, joiós e combatiu.

Aquesta tresena edicion de La Passem, mai longa que jamai, a consolidat l’eveniment coma corsa e a l’encòp fèsta nacionala de revendicacion. S’agís d’una idèa brilhanta del collectiu Ligams, per revendicar la transmission de la lenga, e sustot, per semenar dins nòstras consciéncias que podèm pas permetre que desaparesca la riquesa pus preciosa qu’ajam, qu’es la que fa de nosautres de ciutadans del Mond en occitan e a la faiçon occitana, e qu’aital escambiem amb la rèsta de l’umanitat nòstre biais d’èsser, de pensar, de parlar e de viure.

En mai d’aquò, l’eveniment a amassat cada an una quantitat considerabla d’argent destinat a sosténer de projèctes de reviudacion de la lenga nòstra. La primièra edicion de La Passem se passèt amb grand succès en Bearn en 2018 e arribèt de collectar 48 000 èuros. La segonda ne recampèt 67 000. Ongan, se prevei, doncas, una collècta d’argent mai granda, e nos regaudissèm de veire que lo cònsol màger de Tarba foguèt lo primièr a crompar de quilomètres.

Amb aqueste editorial, la còla de Jornalet volèm benastrugar los organizaires e los participants de l’eveniment al qual esperam d’ajudar dins las edicions venentas. En mai d’aquò, nos alègra que la corsa aja passat dels 400 quilomètres inicials als 1100 actuals. S’aquò contunha aital, La Passem poirà un jorn traversar l’Occitània entièra, çò que serà, de segur, un eveniment de renomenada mondiala.

Òsca per la còla de Ligams!