editorial
L’occitanisme dins las eleccions legislativas
La setmana passada, nòstre editorial soslinhava l'importància de combatre l’extrèma drecha dins las eleccions legislativas imminentas dins l’estat francés, e raportàvem qu’un movement occitan, mai que mai fòrt en Lemosin, aviá facha una crida a se mobilizar e jónher lo Nòu Front Popular.
Aquesta setmana, nos sèm assabentats de las candidaturas occitanistas per aquestas eleccions. D’un caire Endavant/Partit Occitan se presenta en nòu circonscripcions amb lo sosten de Regions e Pòbles Solidaris en Bearn, dins las Landas, en Albigés e Provença. D’autre latz, Bastir Occitània a anonciadas sèt candidaturas en Comenge, Tolosan, Armanhac, Albigés e Agenés amb lo sosten de la federacion regionalista Las Regions Unidas d'Euròpa, que compren curiosament un partit provençal antioccitanista que se presenta dins lo departament de Var.
Nos sèm tanplan assabentats que qualque candidatura occitanista a contactat lo Nòu Front Popular, mas qu’aqueste non sonque a refusat de collaborar mas tanben a quichat per lo retirament de listas. Aquel episòdi lamentable nos remembra que çò mai semblable a un jacobin de drecha es un jacobin d’esquèrra, totes dos units dins lor refús instintiu e impulsiu de la diversitat lingüistica de l’estat francés.
De tot biais, a mai Dòna Le Pen e Sénher Mélenchon sián de nacionalistas franceses allergics a l’occitan, cresèm que lo Nòu Front Popular presenta un programa mai sensible a las minoritats socialas e nacionalas, mentre que l’extrèma drecha es reaccionària e ultrafrancista per natura e que lo macronisme a faches de reformas qu’an greujat l’ensenhament ja precari de l’occitan, a pas aplicada la Lei Molac e a menadas de politicas unicament favorablas a la borgesiá franchimanda al poder. Per tant, fasèm una crida als legeires per que presenten de reclamacions per tal de melhorar lo programa del Nòu Front Popular abans dimenge venent. Un brave amic de Jornalet s’es quitament engatjat a far arribar los messatges personalament a François Hollande, que torna a la politica activa en Lemosin.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
En qualitat d'escirvan occitan, ieu, que non soi pas "roge" coma Rackham, mas "roge e negre" coma los Republicans que, dins Barcelona, arrestèron lo còp d'estat franquista en 1936, considèri que "mon pòble" es "lo pòble que parla (o, mailèu deuriá encara parlar) occitan". Qu'una politica venga a far disparéisser ma lenga, es es mon pòble que dispareis amb ela. E trobatz, Sénher "Rackham Lo Roge" que de jutjar aqueste problèma coma "central" es una traïson ? La traïson de qué ? Non sabi de quin pacte tacite que, de tot biais, non ai pas jamai passat amb degun. Mon pòble, lo de ma lenga, non a d'èsser lo monta-carga sacrificial, del pòble d'una autra lenga, quina que siá, per amor que tot pòble, per sa lenga definit, ne val un autre, ni mai ni mens. Considèri donc que totes avèm un egal dreit d'existir davant l'umanitat sencèra, en rason una egala e irreductibla dignitat. Tot çò que contraven a aqueste principi de fraternitat universala m'es efectivament contrari a la concepcion que fau de la Republica. Cadun son punt de vista, mas non ai traït degun. E non vesi çò qu'un tal punt de vista poiriá aver de narcissic : n'espèri d'explicacions racionalas. Insultar l'autre non vos dona rason.
Vòstra logorrèa narcissica o embonilhista es pas digna de l'istoria del mouvement occitanista eissit de la resisténcia e despuèi sa fondacion en 1945.
Jutjar tota situation politica "del punt de vista de la lenga occitana" coma se tot dins la vida se resumiguèsse a l'oficialitat de la lenga occitana aquò es pas esser en acòrdi amb las valors dels grands occitanistas del s. XX. Es quitament un abandon, una traïson.
Es vergonhós.
Aürosament que Jornalet mòstra una dralha pus coerenta e digna que la vòstra.
Persolament, non vòli dels nacionalistas franceses (per esséncia fascistas, declarats o non) ni de las politicas supremacistas ordinàrias ni extraordinàrias… Qué me suggeririatz de votar, quin partit indiscutiblament e immediatament favorable a la cooficializacion equitabla (de rigorosa egalitat republicana de la lei, los medias e l'ensenhament) de las lengas ditas "de France" ?
Bon, cal dire qu'en general, non vòli votar per de mariòls passant per nos representar. Vòli votar dirèctament las leis, sense intermediari…
Occitania,
tèrra de convivencia,
totes amassa,
contra l'extrèma drecha !
del fascisme, ne volèm pas !
los fascistas, passaràn pas !
https://www.youtube.com/watch?v=I2Tb86nKNoQ
1936/2024 : Lo Meteis combat!
Non al fascisme !
Passaràn pas !
Viva lo Front Popular !
https://www.youtube.com/watch?v=i2tb86nknoq
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari