L’estiu es un moment important de l’annada per viure l’occitan e lo far viure. Aital, dins la primièra setmana de julhet l’Universitat Occitana d’Estiu de Nimes se consagrèt a l’exploracion del concèpte de “país”, un tèrme sovent utilizat amb de connotacions sentimentalas, nostalgicas e politicas que manifèsta de dimensions variadas e complèxas, mai que mai dins lo domeni occitan . En mai d’aquò, se clava uèi l’Universitat d’Estiu de la Guépia (Segalar Roergàs), que dins sa 24a edicion a prepausada una setmana fòrça rica en practicas, corses, reünions e activitats culturalas demest las qualas soslinham la preséncia d’Eric Roulet e Natalia Casaucau qu’i an portat l’accent gascon e las musicas sabentas oblidadas, e tanben de la còla de videastas de Dètz, qu’an enriquidas las jornadas amb de projèctes creatius e innovants. Un moment particularament esmovent foguèt la representacion teatrala de PontdeViaur, junh de 1944, ont Joan-Loís Courtial remembrèt cossí las paraulas pòdon salvar de vidas fàcia a la violéncia e la barbariá. Los eveniments d’aquela mena festejan pas solament la cultura, mas tanben nos ramentan la capacitat de resistir e d'afrontar las adversitats.

50 ans de l’EOE

Ara tot es prèst per un dels eveniments mai importants: l’Escòla Occitana d’Estiu (EOE) de Vilanuèva d’Òlt, qu’ongan festeja sa 50a edicion. Aquel bastion de la normalitat occitana aculhís de centenas de participants dedicats a la transmission e al mantenement de las lenga e cultura occitanas, e prepausa de corses de lenga en diferents dialèctes, d’activitats culturalas, de vespradas e de conferéncias qu’ofrisson una immersion completa dins l’occitan. Ongan, l’EOE prepausa una vision especiala sus las Valadas. Ja un grop d’aquí èran a la primièra edicion en 1974 amb Francés Fontan. A mai, dins l’edicion d’aqueste an, la Chambra d’Òc prepausa de seradas, de conferéncias e de presentacions sus la consciéncia de las Valadas, la literatura, la lenga, lo Prèmi Ostana e de projèctes avenidors. Aquesta edicion de l’EOE promet d’èsser una celebracion significativa de l’identitat occitana.

Aqueles eveniments son indispensables, non solament per celebrar la cultura occitana, mas sustot per reafirmar son importància e sa vitalitat dins lo Mond actual. Son de moments essencials per totes los que nos batèm cada jorn per viure al país, per ne reviscolar la lenga e  ne dignificar la cultura.

Dins lo meteis èime, desiram bon astre a la primièra edicion de la Nòv'Estivada.