Aué, 28 de junhsèga de 2024, era Corsa d’Aran per sa Lengua que hestege eth sòn trentau anniversari. Er eveniment, non solament destaque era persistència d’ua revendicacion, mès tanben era capacitat deth collectiu Lengua Viua entà amassar a toti es aranesi, de quina ideologia que sigue, en ua luta comuna per usatge sociau dera lengua deth país en país.

Aquera unitat des aranesi hè 30 ans que se manifèste cada darrèr dimenge de junhsèga e mos arribe damb toti es accents dera lengua occitana gràcies ara bona idèa de clauar cada an era corsa damb un concèrt de Nadau, qu’ei ara eth grop de musica mès popular d’Aran. Ath delà, er eveniment hè a vier de mès en mès compatriòtes de Garona enjós ena hèsta màger dera lengua nòsta qu’ei, en fin de compde, er occitan de toti.

Jos era devisa “Qui ten era lengua, ten era clau” —extrèta d’un poèma de Mistral—  era Corsa d’Aran per sa Lengua demòstre qu’era lengua ei un pilar fonamentau dera identitat aranesa. Eth hèt d’arribar ara 30u edicion ei un testimòni deth supòrt e dera passion qu’era comunautat aranesa a entà preservar e e refortir era sua identitat. En un mon de mès en mès globalizat, e en un encastre completament desfavorable, ei vitau d’arrebrembar era importància de protegir e promòir era lengua deth país.

Per tant, en aguest editoriau, era còlha de Jornalet vò exprimir era sua felicitacion ath collectiu Lengua Viua pes sues dedicacion, passion e resiléncia e sustot peth hèt d’auer artenhut de tier ath pòble aranés unit e afrairat en combat pera lengua.