editorial
París: un campament militar per la glòria dels estats-nacion
La vila de París es venguda un camp militar, lo pus grand dempuèi la Segonda Guèrra Mondiala, per contrarotlar los Jòcs Olimpics. Amb 15 000 soldats mobilizats per tot l’estat francés, los paures son estats expulsats del quartièr olimpic e la requisicion dels albergament dels estudiants a mostrat que son sovent insalubres. Tot aquel desplegament per d’espròvas esportivas ultramediaticas que los esportius occitans i poiràn pas jamai participar jos la bandièra occitana.
Los Jòcs Olimpics modèrnes son una creacion de Pierre de Coubertin per exaltar lo nacionalisme francés après la desfacha dins la Guèrra Francoprussiana de 1870. E jos aquela amira jacobina son venguts un montatge mediatic per glorificar los estats-nacion. Mentre que son oficialament inspirats per la Grècia antica, Coubertin volguèt pr’aquò imitar lo sistèma d’educacion britanic victorian e s’opausèt a la participacion de las femnas.
Los regims totalitaris del sègle XX, coma l’Alemanha nazi e l’Union Sovietica, embracèron aquela idèa amb entosiasme, en utilizant l’espòrt per promòure lor ideologia e crear de ciutadans fisicament fòrts al servici de l’Estat. Uèi, l’interdiccion de la participacion de Russia contrasta amb la preséncia d’Israèl e d’autres païses que mesprèsan o atacan lors minoritats nacionalas o etnicas e los dreches de las femnas e de la comunautat LGBTIQ+, en creant de tensions sus e fòra de las pistas. La delegacion de l’Estat Ebrieu i participa jos de mesuras de seguretat fòrtas, e fòrça atlètas, mai que mai d’origina aràbia, se tròban dins un dilèma personal e professional a l’ora de concórrer contra los representants d’Israèl. De separar l’espòrt de la politica es malaisit, subretot dins una competicion tant importanta ont los uèlhs del Mond entièr son sus eles. De son caire, Afganistan a recebut los dreches de difusion del CIO, mas la television locala censura totas las competicions femeninas.
De fach, volèm soslinhar que l’espòrt, actualament, malgrat que siá benefic per la santat publica, es un dels domenis amb mai d’inegalitats economicas, amb mai de segregacions e mai de desequilibri de poder. Del temps que qualques atlètas obtenon de revenguts enòrmes, fòrça enfants e joves devon pagar per practicar una activitat reconeguda coma bona per la santat.
En conclusion, los Jòcs Olimpics, dins lor grandor e polemica, nos mòstran un miralh de nòstra societat, ont es tanplan necite un combat per l’egalitat, la justícia e la dignitat umana. E mentretant, o tornam dire, los esportius occitans i pòdon pas participar coma occitans.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Los transpòrts son la causa màger de pollucion dels Jòcs Olimpics a causa dels desplaçaments massises dels 15 milions d'espectators, demest los quals 10% venon de l'estrangièr. A aquò s'ajusta lo vilatge dels atlètas, de lors acompanhaires e dels jornalistas venguts del mond entièr, sovent per avion. Los transpòrts representaràn 40% de las emissions de gases d'efièch de sarra. En mai de la competicion entre estats, es lo quite modèl d'aqueles eveniments planetaris que cal transformar.
Aquela article m'agrada.
Mas emben la ceremonia de drubertura quò es tota la politica que vai i laissar de la pluma. Avem tornat votat e a chaque còp quò es totjorn los mesmes que son au poder. Alaidonc perqué votar? Quò es ben Macron qu'a decidat de tot mesme contre l'avis de la Vila de Paris e daus frances. Quò a colat belcòp d'argent.
Darrier aquela filosofia i a una ideologia que cercha a s'implantar dins la populacion: l'òm inversa las valors umanas e lo plan deven lo mau quand lo mau es erigeat en plan. Quò se fai emben la corupcion, l'argent. Quò tòca pas solament los catolics; quò tòca tot lo monde.
França s'en vai vers sa mòrt que lo governament frances a estat botat sos tutela per l'Union Europeena. En tant qu'occitaniste l'òm porria pensar que quò es una bona causa. Mas, lo noveu governament ( l'union europenna) es un dictator qu'a pas idéia de balhar de las libertats aus pais europeens e enguera mens a de las minoritats nacionalas. Non, chausis totjorn la preferença mondialista qu'es de far respectar la politica daus poderos los pus cheitius de la planeta. Los partits politics son pus ren. Segre lo buòu lòr suffit.
L'idéia es de quitar l'Euròpe, l'OTAN qu'es sos la dominacion daus Estats-Unis, es a dire de realisar lo Frexit per quitar tots los liams que l'Euròpe a establit pus leu que voler transformar l'Euròpe que vòl gardar los renes. La politica es nonmas un discors. L'espòrt i laissara de las plumas; être totjorn plus fòrt que l'autre. A qual prix? L'òm vei dins la boxa feminina o mesma lo basquet dau brejadis per saber si son de las femnas o daus òmes.
Dins las annadas 1970 J. Chirac primava los vedeus de lach qu'avian reçaugut de las ormònas. E lo paisan disia " quò se vesia ren qu'a l'uelh que los vedeus qu'avian estat piquats eran pus gròs que los autres. Pesavan mai e lo pretz era pus elevat perque lo vedeu se vendia au Kg. Esser primat podia triplar lo pretz. E los autres que denonçavan las ormònes volian nos far crebar de fam?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari