L’estiu e las vacanças son per se pausar, se relaxar, se distraire, escapar a las preocupacions del trabalh e gaudir del léser. Un biais d’o far es en viatjant e en coneissent de nòus endreches e en vivent de nòvas experiéncias. Descobrir d’autras culturas es enriquidor e permet, per exemple, d’èsser mai autocritic e, a l’encòp, de metre en valor las causas bonas qu’avèm en cò nòstre e que, tròp sovent, valorizam pas pro.
 
Pasmens, e mai se sèm plan partisans dels viatges alonhats, sèm tanben pel torisme de proximitat. Conéisser plan un país tan grand coma Occitània se pòt solament far amb de temps, e las vacanças d’estiu son idonèas per o far. Vesitar la Val d’Aran, se relaxar en Peiregòrd, virar per los Causses, se bronzar sus la còsta de Provença, se passejar per las Valadas o percórrer las Lanas, son d’experiéncias prèpas que pas totjorn valorizam pro. Cal pas tròp de jorns ni far de grands desplaçaments, mas se cada estiu consagram qualques jorns a conéisser lo país nòstre descobrirem qu’Occitània es un país absoludament complet.
 
A l’encòp, conéisser plan lo nòstre país es un acte de patriotisme occitan que deuriá èsser un fach normal. L’alienacion nacionala del nòstre pòble s’exprimís, coma avèm sovent dich, a travèrs de la desconeissença del país, çò que nos mena a la division intèrna e a l’assompcion de referents exteriors a la nòstra realitat. Dins aquel sens caldriá que los diferents responsables toristics regionals occitans s’acordèsson per una estrategia promocionala conjoncha. L’union fa la fòrça, e un labèl “Torisme Occitan” provocariá, per se meteis, un cambiament de mentalitats.