editorial
Projècte Jornalet 2025: un espaci de vida per l’occitan entre las mans de la generacion Z
Dins nòstre combat per tornar a l’occitan una plaça coma lenga viva de comunicacion sociala e culturala, es indispensable d’aver amb nosautres la Generacion Z. Cal que los nascuts entre 1997 e 2012 prengan lo poder e fagan partida vesidoira e activa de la cultura occitana. La clau de la reviudacion de l’occitan coma lenga sociala son eles.
I a fòrça joves d’aquela generacion que s’interèssan a l’occitan per de rasons divèrsas. D’unes cèrcan lor identitat culturala, d’autres an de consciéncia politica en favor de la diversitat e las minoritats, d’autres an estudiat l’occitan a l’escòla, al collègi, al licèu... o ben an fach lors estudis en Calandreta; e un nombre creissent mòstran d’interès pels estudis universitaris d’occitan a Bordèu, Tolosa o Montpelhièr. Pasmens, en defòra de las salas d’estudi, i a pas gaire d’espacis per metre la lenga en practica. Es aquí que Jornalet se prepausa coma un espaci virtual ont far viure l’occitan.
Amb aquela vision, lançam lo Projècte Jornalet 2025, una iniciativa concebuda per facultar la transicion dels joves occitans d’una identitat adolescenta a una identitat adulta, en aprofechant Jornalet coma un espaci comun occitan virtual. Aquesta generacion, sovent descricha per son inclusivitat, son desinterès per las ierarquias tradicionalas e una preferéncia pels formats corts e visuals, representa a l’encòp un desfís e una escasença.
Lo Projècte Jornalet 2025 prepausa una tièra de cambiaments per far d’aqueste quotidian en linha una plataforma mai atractiva e dinamica per la Generacion Z, tant coma legeires coma creators de contenguts. Qualques unes dels melhoraments que prevesèm son:
un dessenh web mai intuitiu e participatiu
un aument del contengut visual e d’un biais cort per s’adaptar al ritme del consum dels joves
la transformacion de la pagina iniciala en un flux cronologic ont quin tipe que siá de contengut (articles, fòtos, vidèos) aparesca amb un imatge, un títol e una categoria clars
l'espandiment de la còla de collaboradors, en inclusent d’istòrias suls rets socials, de contes, d’arts visuals, de poesia e de critica culturala (libres, jòcs, podcastes)
limitar la longor dels articles, amb la possibilitat de publicar d’articles mai longs dins de seccions especializadas
daissar la foncion "m’agrada" sus cada element per donar de retroaccion positiva als autors e eliminar l’opcion "m’agrada pas”, amb la tòca de crear una atmosfèra mai constructiva e inclusiva.
Amb aqueles cambiaments, volèm que Jornalet venga una immersion quotidiana, accessibla, divertissenta e informativa que ressone amb l’esperit de la Generacion Z.
Aqueles melhoraments son fruch d’un estudi fach per d’expèrts pendent tota l’annada e implican un esfòrç tecnic bèl. Per los menar a bon tèrme aviam una campanha de finançament. Amb la collaboracion de totes, podèm concretizar aqueste projècte de bastir un espaci de vida per l’occitan.
Las culturas son vivas tant que i a qualqu’un que las manten, e ara ven a la Generacion Z de far viure l’occitan.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Felicitacions a la còla de JORNALET ! Es una iniciativa intelligenta, plena d'abeluc, de vam, d'estrambòrd ! Avètz plan rason! Es als joves de prene las iniciativas, de dire e de decidir. Lor cal, per aquò far, daissar la brida sul còl. Los cal daissar liures. A nosaus los vièlhs de metre la man a la pòcha sens far de rasonaments. L'avenidor ? Son los joves ! E urosament! An mai de biais, mai d'idèias que non pas la vièlha generacion. Lor cal far fisança !
Espèri que totes los ensenhaires ausiràn Jornalet e que lançaràn dins lor classa una participacion de las mai activas ! Visca los joves e visca Jornalet.
Quora un contengut pagant sus abonament ?
Quitament se sèm pas fòrça i a un public prèst a pagar.
Pagui per la pressa que legissi. Perqué Jornalet demorariá completament a gratís ?
Per los comentaris, aimeria plan qu'i aja un brolhon; aitau l'òm pòd l'enregistrar e i tornar dos o tres oras apres tant per ameliorar l'ortografe que per adobar lo text si quò es possible.
Dins las annadas 1960/1970 un obrier disia "veiretz quò es los jòunes que nos sauveran". Volia dire los qu'avian fach de las estudis coma Chirac e tots los enarques de sa generacion. Vers las annadas 1990, avian lançadas l'ideia de Generacion Mitterand. L'òm a vist çò qu'aquela generacion Mitterand a balhat. L'òm a pas besonh d'una generacion Z. Aus jòunes l'òm lòr balha un còp de pè dins lo darrier perque lòr an dich que son l'avenir de l'umanitat. E saban en realitat ren de la vita qu'an la testa plena mas lo còr vide.
Quò es a partir de 1975 que l'òm comença a reflechir sur la vita e escriure sas memòrias. La vita se batit sur l'experiença de las generacions passadas. Si l'òm ensenha que las armadas de Clovis an conquis Paris e los visigòts au son de la Marselhaisa e dau drapeu bleu-blanc-roje, l'òm vei còpsec que quò es pas vrai.
Generacion 1960 que cresiava que tot era permis e qu'auretz pus besonh de trabalhar, Generacion 1980 nascuda dins una biblioteca perque los livres eran a maison. Generacion 2000 que cresiavan qu'a 20ans, aurian de las veituras volantas que podrian en 5mn vos emmenar en Egipte e mesme dins l'espaçi. Darrier la generacion Z, i a ren que lo vide perque viure en se visant dins un smartòfone balha pas l'experiença de la vita. Quand aus especialistes chaldra chausir los contestataires pus leu que los conservators.
Qui vai decidar dins jornalet las orientacions de la pensada?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari