Aqueste diluns, 4 de novembre, Marselha aculhís una nòva escòla, una calandreta que dobrís sas pòrtas per somondre als enfants marselheses un ensenhament immersiu en occitan, en afortissent aital nòstra lenga e nòstra cultura dins la vila pus importanta de nòstre país. Aqueste nòu establiment representa un pas de mai devèrs la preservacion e la difusion de l’occitan, en prepausant a las nòvas generacions la clau de lor identitat. Saludam, per tant, amb jòia, la Calandreta dei Gabians.

Las escòlas Calandreta refusan a cada rintrada qualques centenats d’escolans, car i a plan mai de demandas que de plaças possiblas. Cresèm que se deu passar aitant dins l’educacion publica, ont i a mai d’enfants que voldrián aprene la lenga que d’efectius per l’ensenhar. Aquò es, d’un latz, una marrida nòva, mas de l’autre es un indicador estrambordant que la consciéncia d’occitanitat es pas mòrta.

Dins los mai de dotze ans de vida de Jornalet avèm remarcat que l’occitan a totjorn sa plaça dins lo Mond, e que lo Mond vist, comprés e explicat a la faiçon occitana, es legit cada jorn per mai d’un milièr de personas, que quitament daissan de comentaris e crèan de debats mai o mens interessants. La còla de Jornalet sèm contents de nòstra modèsta contribucion a l’usatge social de l’occitan dins lo ret. Ça que la —delà la Val d’Aran e las Valadas— l’usatge social de l’occitan es practicament inexistent per carrièras, mas nos volèm pas resignar. Per aquela rason, trabalham per poder viure e decidir al país amb dignitat, a l’occitana e en occitan. Cresèm qu’es important de sonhar la consciéncia d’occitanitat, e es d’aitan pus important de transmetre la lenga. Dins aquel sens, l’escòla en occitan (o almens l’occitan a l’escòla) es un afar prioritari.

Nòstra tòca es de far un esplech jornalistic e informatiu per crear cada jorn de contenguts qu’expliquen l’actualitat, en donant una plaça a totes los vejaires possibles e en èsser dobèrts a la participacion extèrna per favorir qu’aqueste mèdia siá una aisina utila e pròcha. Volèm que se n’apròprien totes los agents que participan a la vida sociala, politica, educativa, esportiva e culturala del país. Mai que mai, las escòlas.

Una de las seccions del jornal que cresèm pus importanta es la de l’escòla. A mai, es una de las que volèm refortir amb lo projècte Jornalet 2025, pensat per la generacion Z.

Nos agrada fòrça que las escòlas, que sián de calandretas o de l’educacion publica, empliscan aquela seccion amb de nòvas, per que los quites escolans fagan viure l’occitan delà las salas d’estudi e partegen amb los legeires de faches que fan l’actualitat dins cada escòla: un eveniment cultural, la vesita d’una personalitat, una fèsta populara amb los parents, una competicion esportiva, etc.

Per tant, a mai de saludar amb jòia l’arribada de la calandreta de Marselha, l’encoratjam, coma o fasèm per totes los establiments ont se fa d’occitan, a participar e mandar de nòvas a Jornalet. Pensam que pòt èsser un bon luòc de rescontre per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.